Ministrja në detyrë e Drejtësisë dhe kryetarja e Listës Guxo, Donika Gërvalla, ka folur për largimin e ish-deputetëve Haxhi Avdyli, Jeta Statovci dhe Albena Reshitaj, të cilët i janë bashkuar listes tjetër politike të ish-presidentes, Vjosa Osmani.
Në emisionin “Këndi i Debatit” në Tëvë1, Gërvalla ka thënë se largimi i tyre është një vendim i natyrshëm politik dhe se secili kandidat duhet të vlerësojë vetë perspektivën e tij zgjedhore.
“A na mungojnë apo do të na mungojnë, atë do ta tregojë rezultati i 7 qershorit. Ata nuk janë në listë tek ne, por janë në një listë tjetër. Është në rregull, sa më përket mua, që secili kandidat në fund të një periudhe zgjedhore të mendojë pozicionin e vet. Nëse këta të tre mendojnë se në një listë të përbashkët me LDK-në kanë perspektivë më të mirë politike dhe më shumë mundësi për karrierë, atëherë ata duhet të shkojnë”, ka deklaruar ajo.
Gërvalla ka shtuar se nuk e kundërshton vendimin e tyre për t’u bashkuar me një listë tjetër, duke theksuar se secili është i lirë të zgjedhë rrugën e vet politike.
Ajo ka theksuar gjithashtu se me Haxhi Avdylin dhe Jeta Statovcin Guxo ka pasur bashkëpunim të mirë dhe se të dy kanë mbajtur edhe pozita drejtuese në parti, ndërsa Albena Reshitaj, sipas saj, nuk ka qenë asnjëherë pjesë e Guxo.
“Secili duhet të shkojë aty ku i flen zemra, prandaj unë jam e fundit që e ndal dikë apo që përpiqem t’ia ndërroj mendimin. Këta të tre ish-personalitete të partisë Guxo, me të cilët kemi pasur një bashkëpunim shumë të mirë, kanë vendosur të shkojnë dhe të garojnë në një listë tjetër. Unë iu uroj shumë sukses dhe shpresoj që ajo çfarë presin në listën tjetër t’u realizohet. Ne do të vazhdojmë punën tonë aty ku kemi shkuar të gjithë së bashku. Ne nuk kemi braktisur pozicionet e përbashkëta, jemi aty ku kemi shkuar së bashku dhe me të njëjtat plane që kemi pasur së bashku, edhe me këta tre deputetë. Prej tyre, Albena Reshitaj nuk ka qenë asnjëherë pjesë e partisë Guxo, ndërsa Jeta Statovci dhe Haxhi Avdyli kanë qenë edhe nënkryetarë të partisë. Prandaj kam dëshirë që këta të arrijnë realizimin e ambicieve të tyre në atë listë ku kanë shkuar, nëse nuk kanë arritur t’i realizojnë së bashku me ne në partinë Guxo”, është shprehur ajo.
Gërvalla ka shtuar se partia do të vazhdojë punën e saj sipas planeve të përbashkëta të mëhershme.
