Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim zyrtar ushtruesen e detyrës së Presidentes së Kosovës, Albulena Haxhiu.
Sipas njoftimit, gjeneral Jashari e ka informuar Haxhiun për proceset nëpër të cilat po kalon Forca e Sigurisë së Kosovës, të arriturat e saj dhe planet për zhvillimin e mëtejmë.
Gjatë takimit është diskutuar për planifikimet strategjike të FSK-së, duke përfshirë fazën aktuale të Planit Gjithëpërfshirës të Tranzicionit, procesin e planifikimit afatgjatë të zhvillimit dhe sfidat aktuale të forcës.
Po ashtu, është theksuar rëndësia e pjesëmarrjes së FSK-së në operacione ndërkombëtare jashtë vendit, duke u vlerësuar se kjo e pozicionon Kosovën si kontribuuese në sigurinë globale, transmeton Zeri.info.
Nga ana tjetër, Haxhiu e ka përgëzuar gjeneral Jasharin për të arriturat e deritanishme të FSK-së dhe rezultatet e treguara në aktivitete të ndryshme brenda dhe jashtë vendit.
Në përfundim të takimit, të dyja palët janë pajtuar për rëndësinë e bashkëpunimit institucional dhe vazhdimin e zhvillimit të FSK-së drejt një force moderne dhe profesionale në rrugën drejt anëtarësimit në NATO. /Zëri
