Një 16-vjeçar është ndaluar për 24 orë në Ferizaj, pasi dyshohet se ka kanosur dy persona me një armë gazi.
Sipas njoftimit të Policisë së Kosovës, rasti është raportuar mbrëmjen e së martës, më 8 korrik 2026, rreth orës 23:40, kur Stacioni Policor në Ferizaj ka pranuar informacion për një rast të dyshuar të kanosjes me armë zjarri.
Policia ka bërë të ditur se njësitet policore kanë reaguar menjëherë dhe kanë dalë në vendin e ngjarjes, ku kanë identifikuar personat e përfshirë në incident. Në stacionin policor janë shoqëruar dy viktimat dhe një person i dyshuar.
“Tek i dyshuari, F.A. (16 vjeç), gjatë kontrollit është gjetur në posedim një pistoletë me gas, me gjashtë (6) fishekë,” thuhet në njoftimin e Policisë.
Sipas policisë, dy viktimat janë intervistuar, ndërsa i dyshuari nuk ka mundur të intervistohet, pasi ndodhej nën ndikimin e alkoolit.
“Me vendim të prokurorit të shtetit, i dyshuari është ndaluar për 24 orë dhe ndaj tij është iniciuar procedurë penale për veprat: ‘Kanosje’ dhe ‘Mbajtje në pronësi, kontroll ose posedim të paautorizuar të armëve’,” ka njoftuar Policia e Kosovës.
Rasti është duke u hetuar nga organet kompetente.
