Etapa e tretë e “Tour de France”, e cila zhvillohet të hënën, do të mbahet pa praninë e publikut për shkak të rrezikut të madh nga një zjarr masiv pyjor në jugperëndim të Francës, kanë njoftuar autoritetet lokale.
Zjarri ka përfshirë mbi 1,600 hektarë tokë rreth 60 kilometra larg vijës së finishit në Les Angles dhe po vazhdon të përhapet. Pamjet nga zona tregojnë tym të dendur të zi, ndërsa banorët dhe dëshmitarët raportojnë erëra të forta, temperatura ekstreme në tokë, vështirësi në frymëmarrje dhe shikueshmëri shumë të ulët.
Autoritetet kanë bërë të ditur se itinerari i garës nuk do të ndryshohet, por karvani i publicitetit nuk do të kalojë në 40 kilometrat e fundit të segmentit që lidh Spanjën me Francën, prej nga nisi gara të shtunën.
Çiklistët do të vazhdojnë garën vetëm me stafin minimal të nevojshëm për zhvillimin e saj, sipas prefekturës së departamentit Pyrenees-Orientales. Po ashtu, autoritetet u kanë bërë thirrje qytetarëve të mos afrohen në zonën e garës apo në vijën e finishit, në mënyrë që forcat e sigurisë të përqendrohen në luftimin e zjarrit.
Rreth 750 zjarrfikës, 200 automjete dhe nëntë helikopterë janë angazhuar për shuarjen e flakëve në një front prej 18 kilometrash. Deri tani nuk raportohet për viktima, por dy persona — një zjarrfikës dhe një banor — ndodhen në gjendje kritike.
Në rajonin fqinj të Katalonjës në Spanjë, një tjetër zjarr që kishte përfshirë rreth 2,200 hektarë është stabilizuar, por temperaturat e larta vazhdojnë të vështirësojnë shuarjen e plotë të tij.
Autoritetet paralajmërojnë se vala e të nxehtit dhe rreziku i zjarreve mbeten të larta në disa rajone të Evropës jugore, duke rritur shqetësimet për sigurinë gjatë edicionit të këtij viti të “Tour de France”./Reuters
