Ish sehfi i BIA-s serbe, Aleksandër Vulin duke përdorur retorikë nacionaliste dhe kritika të ashpra ndaj orientimit pro-evropian të Malit të Zi ka sulmuar atë pas deklaratës simbolike të Komunës së Zetës për “çnjohjen” e Kosovës.
Sipas Vulinit, njohja e Kosovës nga Podgorica në vitin 2008 i kishte bërë dëm “fytyrës” dhe “heroizmit” të shtetit malazez, ndërsa vendimin e Zetës e cilësoi si një akt që, sipas tij, “u rikthen dinjitetin serbëve që krijuan dhe mbrojtën Malin e Zi”.
“Kur qeveria pro-evropiane dhe për këtë arsye anti-serbe e Malit të Zi njohu të ashtuquajturën Kosovë, Mali i Zi humbi atë pak heroizëm që i kishte mbetur nga paraardhësit e tij më të mirë”, deklaroi Vulin raporton Pobjeda.me përcjell Dukagjini.
Ai tutje ka glorifikuar narrativat nacionaliste serbe duke përdorur referenca historike e ideologjike e që është vazhdim i diskursit destabilizues ndaj Kosovës dhe vet rajonit.
Reagimi i Vulinit vjen pasi Komuna e Zetës më 12 maj miratoi një deklaratë të çuditshme për “çnjohjen” e Kosovës, një veprim pa asnjë efekt juridik, por me ngarkesë të fortë propagandistike, i shtyrë nga politikani proserb Milan Knezheviq.
Deklarata u votua nga këshilltarët lokalë të partive pro-serbe dhe u promovua menjëherë nga Knezheviqi në rrjetin X si një “hap historik” drejt anulimit të njohjes së Kosovës nga Mali i Zi.
Megjithatë, politika e jashtme dhe njohjet shtetërore janë kompetencë ekskluzive e qeverisë qendrore dhe parlamentit të Malit të Zi, jo e komunave, çka e bën këtë akt më shumë një manovër politike dhe propagandistike sesa një vendim me pasoja reale.
Knezheviqi, i njohur për qëndrimet e tij proruse dhe afërsinë me Beogradin zyrtar, po e përdor çështjen e Kosovës për mobilizim politik dhe për forcimin e bllokut nacionalist serb në Mal të Zi.
Në deklaratat e tij ai ka folur për “larjen e turpit” nga njohja e Kosovës, duke e cilësuar vendimin e vitit 2008 si njollë mbi “fytyrën malazeze”.
Kjo retorikë shihet si përpjekje për rikthimin e narrativave të viteve të ’90-ta dhe për tensionimin e mëtejshëm të raporteve në rajon, në një kohë kur Mali i Zi vazhdon të përballet me përplasje të brendshme mes orientimit perëndimor dhe ndikimit serbo-rus.
Mali i Zi më 9 tetor 2008 kishte njohur Republikën e Kosovës duke u bërë ndër fqinjët e parë që njohën pavarësinë e vendit tonë.
Zeta miraton deklaratën për “çnjohjen” e Kosovës, entuziazëm në kampin proruso-serb në Mal të Zi
