Temperaturat thyen rekordet e muajit qershor në Gjermani, Belgjikë dhe Holandë të premten, ndërsa numri i viktimave nga vala e të nxehtit në Evropë u rrit në Spanjë dhe Francë. Autoritetet anuluan koncerte dhe ngjarje të tjera publike për shkak të rreziqeve për shëndetin.
Temperatura më e lartë e regjistruar ndonjëherë në Gjermani, 41.3°C, u mat paraprakisht në qytetin jugperëndimor Saarbrücken, pranë kufirit me Francën. Franca kishte përjetuar këtë javë temperaturat më të larta për tre ditë radhazi, shkruan BBC, transmeton Dukagjini.
Megjithëse vala e të nxehtit në Francë ka arritur kulmin dhe po fillon të zbutet, ministrja franceze e Shëndetësisë, Stéphanie Rist, tha se “shfaqja e vdekjeve në shtëpi” është veçanërisht shqetësuese.
Zëdhënësja e Organizatës Botërore Meteorologjike (WMO), Clare Nullis, paralajmëroi për “ndikime të mëdha” në shëndet, ekosisteme, bujqësi dhe punë, duke shtuar:
“Fatkeqësisht, duhet të mësohemi me këtë.”
Vala vdekjeprurëse e të nxehtit në qershor është zhvendosur ngadalë drejt veriut dhe lindjes së Evropës. Meteorologu belg David Dehenauw tha se në mënyrë jozyrtare janë regjistruar 40°C në Kleine Brogel, pranë kufirit me Holandën.
Në provincën jugore holandeze të Limburgut u regjistrua një temperaturë maksimale prej 39.4°C. Ndërkohë, në Mbretërinë e Bashkuar, një rekord i përkohshëm për muajin qershor prej 37.1°C u regjistrua në Cavendish, në qarkun Suffolk.
Sipas llogaritjeve të agjencisë së lajmeve AFP, të paktën 150 milionë njerëz në të gjithë kontinentin evropian po përballeshin të premten me temperatura mbi 35°C.
Meteorologët çekë besojnë se rekordi kombëtar i vitit 2012 prej 40.4°C mund të thyhet të shtunën, ndërsa parashikuesit austriakë mendojnë se rekordi kombëtar do të bjerë të dielën. Edhe vendet e Ballkanit po përjetojnë vapë ekstreme, me temperatura deri në 39°C të parashikuara në Serbi gjatë fundjavës.
Në Zvicër, centrali bërthamor Beznau nxori jashtë funksionit të dy reaktorët të premten, sepse temperatura e lumit Aare arriti në 25°C, nivel që konsiderohet shumë i lartë për të siguruar ftohjen e mjaftueshme të reaktorëve.
Në Francë, Gjermani, Itali, Spanjë dhe në jug të Anglisë, temperaturat po arrijnë 5–12°C mbi mesataren sezonale, si pasojë e një sistemi të qëndrueshëm të presionit të lartë atmosferik, thanë shkencëtarët e grupit World Weather Attribution.
Ky grup konstatoi se muaji qershor po ngrohet më shpejt se çdo muaj tjetër dhe se, në rajonin e studiuar, vala aktuale e të nxehtit është më e rënda e regjistruar ndonjëherë.
Ndryshimet klimatike po rrisin temperaturat në mbarë botën, por veçanërisht në Evropë. Sipas shërbimit klimatik Copernicus, Evropa është kontinenti që po ngrohet më shpejt, me një ritëm dy herë më të lartë se mesatarja globale.
Vapa ekstreme shkaktoi gjithashtu ndërprerjen e një treni Eurostar nga Këlni drejt Parisit, i cili mbeti i bllokuar në lindje të Brukselit me rreth 400 pasagjerë në bord. Sipas agjencisë belge të lajmeve Belga, tre pasagjerë u dërguan në spital si masë paraprake.
