Kanë kaluar 27 vite nga lufta e fundit në Kosovë.
Për shumë prej krimeve të kryera atëkohë, drejtësia ende nuk e ka thënë fjalën e saj.
Nga paslufta e deri në vitin 2018, përgjegjësinë për hetimin e krimeve të luftës, e kanë pasur UNMIK e EULEX.
Punën e këtyre dy misioneve ndërkombëtare, ish-kryetari i Gjykatës së Apelit, Hasan Shala, e konsideron pa rezultat.
“As UNMIK-u, as EULEX-i nuk e kanë kryer atë detyrë për të cilën kanë ardhë me punu. Ata më shumë janë marrë me pjesëtarë të UÇK-së, se sa me kriminelët të cilët kanë kryer krime jashtëzakonisht të mëdha, që janë diku mbi 15 mijë të vrarë, mbi 20 mijë dhunime, krime, plaçkitje, kallje e gjithë ato krime. Ata shumë pak janë marrë, si hetuesit e UNMIK-ut, ashtu edhe të EULEX-it. Edhe atë punë që e kanë bo, e kanë bo mbrapshtë, pasi që gjithë ato prova të cilat janë mundur kinse m’i nxjerrë, por ato i kanë lënë të pasistemume”, thotë Hasan Shala –avokat.
E gjithë kjo shihet si rezultat i qasjes selektive që këto dy misione, vlerësohet se kanë pasur ndaj krimeve të kryera gjatë luftës.
“EULEX-i ka pasë politikë selective, ka pasë fokus të veçantë vetëm ndaj ish krerëve të luftës dhe ushtarëve të UÇK-së, dhe krimeve të supozuara të komandantëve të UÇK-së brenda zonave të tyre të kontrollit. Kurse, sa i përket krimeve të cilat në mazhorancë i kanë kryer domethënë elementi i ushtrisë serbe, i policisë serbe dhe i forcave paramilitare. Ato kanë qenë totalisht jashtë protokollit, domethënë të qëllimit dhe vizionit të tyre për me vendosë drejtësi të drejtpeshume”, vlerëson avokati Asdren Bytyqi.
Që nga viti 2018, kompentenca për hetimin e krimeve të luftës bie mbi institucionet e Republikës së Kosovës.
E nga viti 2021, për këto krime, u bënë ndryshime ligjore që mundësuan edhe gjykimin në mungesë.
