Nivelet e ujit në lumin Danub kanë rënë në minimum historik në Serbi dhe Kroaci, si pasojë e valëve intensive të të nxehtit dhe thatësirës që kanë përfshirë Evropën, duke shkaktuar probleme serioze në lundrim, transport, peshkim dhe turizëm.
Në qytetin verior serb të Novi Sadit, dhjetëra anije kanë mbetur të bllokuara në një shtresë balte dhe llumi të gjelbër, pasi ujërat e Danubit janë tërhequr me disa qindra metra nga shtrati i zakonshëm.
Rënia drastike e nivelit të ujit ka zbuluar brigje të gjera me rërë përgjatë qindra kilometrave katrorë. Në Kroaci, nga ujërat ka dalë një anije mallrash e fundosur që nga viti 1937, ndërsa në Serbinë lindore janë shfaqur mbetjet e ndryshkura të një konvoji gjerman të Luftës së Dytë Botërore, të fundosur në vitin 1944, të cilat tani paraqesin rrezik për lundrimin.
Danube River water levels fell to record lows this week in Croatia and Serbia, exposing a freight ship that sank in 1937 https://t.co/HB0mKSJe3f pic.twitter.com/o3FVsMULnh
— Reuters (@Reuters) July 24, 2026
Situata është e dukshme edhe në Beograd, ku një restorant ka vendosur tavolina dhe karrige mbi një grumbull gurësh që më parë ndodheshin nën ujë, në mes të lumit.
Nivelet e ulëta të Danubit kanë ndikuar edhe në furnizimin me karburant. Ministrja serbe e Energjisë, Dubravka Djedoviç-Handanoviç, deklaroi se importet e karburantit kanë arritur vetëm 25% të objektivit mujor për korrikun, pasi cisternat mund të lundrojnë me vetëm 30–40% të kapacitetit të tyre.
Përveç transportit, thatësira ka goditur edhe sektorët e peshkimit dhe turizmit në Serbi, ndërsa ekspertët paralajmërojnë se niveli i ulët i ujit mund të ketë pasoja afatgjata për ekosistemin dhe jetën e egër.
Sipas Shërbimit Hidrometeorologjik të Serbisë, reshjet e pritshme në rrjedhën e sipërme të Danubit mund të sjellin vetëm një rritje të lehtë të nivelit të ujit në ditët në vijim.
