E shtuna e 20 qershorit nuk i gjeti në pushim.
Kësisoj, këta maturantë e mijëra të tjerë në mbarë Kosovën, në këtë ditë fundjave, iu nënshtruan Testit të Maturës Shtetërore.
E maturantë me hallin e njëjtë, u panë sot edhe në hapësirat e gjimnazit “Ahmet Gashi” në Prishtinë.
Edhe këtë vit, si zakonisht, me sistemimin e nxënësve në klasa, u dorëzuan edhe telefonat e tyre tek administruesit.
Veçqë ndodhi një gjë e tillë, kopjimi nuk u ndal.
Ora shënonte 10:06, vetëm gjashtë minuta pasi që filloi testimi, pyetjet e testit qarkullonin në rrjete sociale, ku ishin të përfshirë edhe maturantët
Por një gjë të tillë, disa nga maturantët e mohuan.
“Mirë ka shku nuk ka qenë vështirë, ka pas më shumë pyetje logjike, pra nuk ishte shumë vështirë. Telefonat është dashur me i lanë me një kuti jashtë klasës edhe për kopjim nuk kemi pas mundësi”, tregoi maturanti, Yll Pllana.
E mundësi për të kopjuar nuk pati as nxënësi Altin Ramadani.
“Mundësi nuk ka pas ashtu për me kopjuar, por edhe nuk ka qenë nevoja se pyetjet nuk kanë qenë shumë të vështira që me pas nevojë me kopju”, tha maturanti tjetër, Altin Ramadani.
Se ky test ishte i lehtë e thotë edhe kjo maturante.
“Jo nuk ka qenë i vështirë, më shumë ishin pyetje logjike veç me i kushtu rëndësi me lexu, nuk janë kanë aq të vështira”, tha Urta Dervidhaj.
Vështirësi apo probleme nuk u hasën as nga ana e administruesve në gjimnazin “Ahmet Gashi” në Prishtinë.
“Procesi ka filluar në orën 10:00 në mënyrë të rregullt i kemi vendosur nëpër klasë edhe gjithçka ka shkuar në rregull. Nuk kemi pas problem as rreth telefonave as ndonjë vërejtje kështu në klasë asnjë nuk e kemi pas”, tha drejtori i shkollës “Ahmet Gashi”, Haxhi Metaj.
Ndonëse në qendrat e testimit procesi u vlerësua i rregullt dhe pa probleme, publikimi i pyetjeve të testit ngjalli reagime.
Pikërisht për këtë reagoi deputetja e LDK-së, Hykmete Bajrami, e cila kërkoi anulimin e testit.
“Nëse nuk ki mundësi me organizu si duhet, anuloje. Që gjashtë vjet radhazi po përsëritet i njëjti dështim – publikimi i testit sapo fillon provimi. Pra, testi i maturës nuk po e shpërblen dijen, por po e favorizon kopjimin. Sot, fatkeqësisht, më të suksesshëm nuk dalin ata që kanë mësu shumë, por ata që kanë arritë me kopju më shumë. Kjo është padrejtësi ndaj mijëra nxënësve të vyeshëm që kanë punu me vite”, tha Bajrami”.
Kujtojmë se procesi i testimit për 19 mijë e 514 nxënës u organizua në 152 qendra të testimit në të gjithë Kosovën dhe u monitorua nga 1360 administrues.
