Teherani ka pranuar se ka progres në negociatat me Shtetet e Bashkuara për arritjen e një marrëveshjeje që synon t’i japë fund konfliktit. Megjithatë, autoritetet iraniane theksojnë se një marrëveshje nuk pritet të nënshkruhet menjëherë.
Zëdhënësi i Ministrisë së Jashtme të Iranit, Esmail Baghaei, deklaroi se “kemi arritur në përfundime për një pjesë të madhe të çështjeve që po diskutohen, por kjo nuk do të thotë se marrëveshja do të nënshkruhet menjëherë”.
Ai shtoi se fokusi aktual i negociatave është përfundimi i luftës dhe jo detajet e programit bërthamor iranian.
Sipas Baghaeit, kërcënimet dhe presionet janë pjesë e politikës amerikane, duke lënë të kuptohet se po i referohej strategjisë së ndjekur nga Donald Trump në rrjetet sociale.
“Ne vazhdojmë punën tonë dhe mbrojmë interesat kombëtare të Iranit. Do të përgjigjemi kur ta konsiderojmë të nevojshme”, tha ai.
Ndërkohë, deputeti iranian Ebrahim Rezaei, përfaqësues i Komisionit për Sigurinë Kombëtare dhe Politikën e Jashtme, u bëri thirrje SHBA-ve të ndalojnë “blofet” dhe të hyjnë seriozisht në negociata.
“Gjatë luftës ushtarake, taktika jonë ishte ‘sy për sy’. Në luftën diplomatike është ‘veprim për veprim’”, shkroi ai në platformën X.
Rezaei deklaroi se koha po punon kundër amerikanëve dhe se Irani nuk do t’u dorëzohet kërcënimeve apo presioneve.
The post Teherani pranon progres: Kemi arritur përfundime për shumicën e çështjeve në negociatat me SHBA-në appeared first on Gazeta Express.
