Presidenti ukrainas, Volodymyr Zelensky, ka paralajmëruar se Rusia po përgatit një sulm të ri masiv ndaj Ukrainës, me objektiva kryesore infrastrukturën energjetike dhe atë logjistike.

Në një adresim të publikuar të hënën mbrëma, më 2 nëntor, Zelensky tha se paralajmërimi bazohet në informacionet e inteligjencës ukrainase.

Sipas tij, Moska mund të synojë ta shfrytëzojë vëmendjen ndërkombëtare të përqendruar te zgjedhjet e mesmandatit në Shtetet e Bashkuara, të cilat mbahen sot, më 3 nëntor.

“Kemi informacione se Rusia po përgatit një sulm të ri masiv ndaj vendit tonë – kryesisht ndaj infrastrukturës energjetike dhe logjistike”, deklaroi Zelensky.

Ai paralajmëroi gjithashtu se Ukraina po përballet me vështirësi në mbrojtjen ajrore dhe me mungesë të raketave për sistemet Patriot.

Kreu i shtetit ukrainas u bëri thirrje Shteteve të Bashkuara dhe komunitetit ndërkombëtar që të ushtrojnë presion ndaj Moskës, në mënyrë që sulmet të mos sjellin përfitime për Rusinë.

Ndërkohë, raportimet e 3 nëntorit flasin për sulme të mëdha ruse gjatë natës ndaj disa rajoneve të Ukrainës, përfshirë infrastrukturën energjetike. Autoritetet ukrainase kanë raportuar dëme dhe ndërprerje të furnizimit me energji elektrike.

Sinjali – aty ku e vërteta flet para lajmit!

/GazetaSinjali/

Burimi: Sinjali