Gazeta e njohur italiane Gazzetta dello Sport ka raportuar për probleme serioze në dhomën e zhveshjes së Napolit, pas humbjes së rëndë 4-1 ndaj Portos në xhiron e katërt të Ligës së Kampionëve.
Sipas mediumit italian, skuadra e drejtuar nga Massimiliano Allegri është ndarë në disa grupe, ndërsa pakënaqësitë mes futbollistëve kanë filluar të bëhen publike.
Në mesin e emrave që përmenden në këtë situatë është edhe mbrojtësi i Kombëtares së Kosovës, Amir Rrahmani (32), të cilin Gazzetta e veçon së bashku me Frank Anguissan si një nga dy futbollistët me përvojë që mund të jenë në shënjestër të kritikave të bashkëlojtarëve.
Napoli pësoi të mërkurën humbjen e shtatë në 14 ndeshje të zhvilluara këtë sezon. Në Serie A, skuadra renditet në vendin e tetë me 14 pikë pas dhjetë xhirove, ndërsa në Ligën e Kampionëve ka grumbulluar vetëm tri pikë në katër ndeshje. Pas disfatës ndaj Portos, disa futbollistë nuk e fshehën pakënaqësinë e tyre me gjendjen aktuale të ekipit.
Gazzetta: Politano mund t’u jetë referuar Rrahmanit dhe Anguissas
Deklarata e Matteo Politanos pas ndeshjes ndaj Portos tërhoqi vëmendje të veçantë. Futbollisti italian, i cili doli para mediave për të komentuar situatën e skuadrës, kërkoi që edhe lojtarët e tjerë të merrnin përgjegjësi dhe të flisnin publikisht për problemet.
“Do të doja që një shok skuadre të vinte dhe të shpjegonte se çfarë po ndodh, dhe jo gjithmonë vetëm ne italianët”, deklaroi Politano.
Gazzetta beson se kjo deklaratë mund t’u jetë drejtuar futbollistëve me përvojë, të cilët kanë një rol të rëndësishëm në dhomën e zhveshjes, por që rrallëherë dalin publikisht për të komentuar situatat pas humbjeve.
Në këtë kontekst, gazeta italiane veçon Amir Rrahmanin dhe Frank Anguissan. Të dy janë pjesë e Napolit prej disa vitesh dhe kanë qenë protagonistë në fitimin e dy titujve të kampionit të Italisë.
Megjithatë, Gazzetta nuk pretendon se Politano i ka përmendur drejtpërdrejt Rrahmanin apo Anguissan, sikurse nuk e bën mbrojtësin kosovar personalisht përgjegjës për problemet e krijuara në dhomën e zhveshjes. Bëhet fjalë për interpretimin e gazetës italiane rreth deklaratës së futbollistit.
Napoli i ndarë në disa grupe, Rrahmani ndër lojtarët me më shumë përvojë
Sipas raportimit të Gazzettas, në dhomën e zhveshjes së Napolit janë krijuar disa grupe futbollistësh, të cilët kalojnë kohë së bashku edhe jashtë fushës.
Grupi i futbollistëve italianë udhëhiqet nga Giovanni Di Lorenzo, Matteo Politano dhe Leonardo Spinazzola. Ndërkohë, Noa Lang dhe David Neres janë veçanërisht të afërt me njëri-tjetrin, ashtu si Alisson Santos dhe Giovane. Edhe Scott McTominay dhe Billy Gilmour kalojnë shumë kohë së bashku.
Frank Anguissa përshkruhet nga gazeta italiane si një futbollist më i rezervuar, i cili në të kaluarën kishte marrëdhënie të afërta me Victor Osimhenin dhe Juan Jesusin. Megjithatë, pas largimit të tyre, ai ka humbur disa nga bashkëlojtarët me të cilët kishte afërsi më të madhe.
Në anën tjetër, Kevin De Bruyne, Stanislav Lobotka dhe Rasmus Hojlund konsiderohen futbollistë të rëndësishëm në fushën e lojës, por sipas Gazzettas, ata kryesisht qëndrojnë larg grupeve të tjera në aspektin e raporteve personale.
Gazeta italiane thekson se deri më tani skuadra ka vazhduar të qëndrojë në mbështetje të trajnerit Massimiliano Allegri, por paralajmëron se rezultatet e dobëta mund t’i përkeqësojnë edhe më shumë marrëdhëniet mes futbollistëve.
De Bruyne dhe Lucca u përplasën gjatë ndeshjes me Porton
Tensionet në skuadrën e Napolit nuk janë vërejtur vetëm jashtë fushës, por edhe gjatë ndeshjeve.
Gjatë humbjes ndaj Portos, Kevin De Bruyne dhe Lorenzo Lucca patën një përplasje verbale, pasi mesfushori belg i shprehu pakënaqësinë sulmuesit italian për një mundësi të humbur shënimi.
Lucca iu kundërpërgjigj me nervozizëm, ndërsa debati mes tyre u kap edhe nga kamerat televizive.
Pas përfundimit të ndeshjes, edhe Scott McTominay dhe Rasmus Hojlund shprehën pakënaqësinë e tyre për rezultatet e skuadrës, duke kërkuar që futbollistët të marrin më shumë përgjegjësi për paraqitjet e tyre.
Sipas Gazzettas, Napoli pritet të organizojë një mbledhje të ekipit dhe të qëndrojë në grumbullim në kampin stërvitor të klubit, me qëllim që të analizojë situatën dhe të përmirësojë marrëdhëniet mes futbollistëve.
Amir Rrahmani është njëri prej futbollistëve me më shumë përvojë në skuadrën aktuale të Napolit, ku është vendosur si një nga lojtarët e rëndësishëm të repartit defensiv që prej transferimit në vitin 2020. Ai ka luajtur te Hellas Verona, Dinamo Zagreb, RNK Splitin dhe Lokomotiva Zagreb. /Telegrafi/
