Presidenti i Shteteve të Bashkuara, Donald Trump, ka deklaruar të martën se ka arritur një marrëveshje me kryeministrin izraelit, Benjamin Netanyahu, për ndërprerjen e financimit prej 4 miliardë dollarësh në vit për Izraelin.
Duke folur në emisionin “Fox and Friends” të televizionit Fox News, Trump tha se Izraeli nuk ka më nevojë për këtë ndihmë, ndërsa pretendoi se disa demokratë dhe politikanë të krahut të majtë po e përdorin mbështetjen financiare amerikane si argument për të kritikuar republikanët.
“Sa i përket pagesës për Izraelin, Bibi Netanyahu dhe unë kemi bërë një marrëveshje që i japim Izraelit 4 miliardë dollarë në vit, dhe kemi rënë dakord muaj më parë që ta ndalojmë. Kemi rënë dakord tashmë që deri në fund të këtij viti nuk do të paguajmë më Izraelin. Por do ta ndihmojmë nëse ka nevojë”, ka theksuar Trump.
Zyra e Netanyahut nuk ka dhënë ndonjë koment të menjëhershëm lidhur me deklaratat e presidentit amerikan.
Megjithatë, ende nuk është e qartë se për cilin financim konkret bëhet fjalë. Memorandumi i mirëkuptimit, përmes të cilit sigurohen 3.8 miliardë dollarë ndihmë ushtarake vjetore amerikane për Izraelin, pritet të skadojë në vitin 2028, ndërsa bisedimet për mënyrën se si do të vazhdojë mbështetja e Uashingtonit pas kësaj date janë në zhvillim.
“Ata mund të blejnë çfarë të duan. Edhe Evropa mund të blejë. Ne prodhojmë armët më të mira në botë”, shtoi Trump të martën.
Në një intervistë të dhënë në maj për televizionin CBS, Netanyahu kishte thënë se shpresonte që brenda një dekade ta largonte Izraelin nga varësia ndaj mbështetjes ushtarake amerikane.
Ndërkaq, në një letër të qershorit drejtuar një kongresmeni amerikan, ai kishte shkruar se kishte ardhur koha që Izraeli “të kalojë nga marrës ndihme në partner”.
Mbështetja publike amerikane për Izraelin ka rënë që nga fillimi i luftës në Gaza, në vitin 2023, veçanërisht në mesin e demokratëve.
Një sondazh i Universitetit Quinnipiac, i realizuar në qershor, tregoi se 48 për qind e votuesve dhe 66 për qind e demokratëve mendojnë se Shtetet e Bashkuara e mbështesin tepër Izraelin. Këto shifra përbëjnë rritje të ndjeshme krahasuar me vitin 2017, kur kjo pyetje ishte bërë për herë të parë dhe përqindjet përkatëse ishin 16 dhe 20 për qind.
Mbështetja për Izraelin në mesin e votuesve demokratë ka rënë ndjeshëm. Kandidatët kritikë ndaj Izraelit po fitojnë zgjedhjet paraprake brenda Partisë Demokratike, ndërsa edhe ligjvënësit e moderuar po sfidojnë gjithnjë e më shumë dekada të tëra të mbështetjes amerikane për këtë shtet.
Trump ka pretenduar se mbështetja financiare për Izraelin po përdoret nga kundërshtarët politikë si argument për të sulmuar republikanët.
“E majta e përdor pagesën prej 4 miliardë dollarësh, që të gjithë e dinë, si shenjë padrejtësie, dhe ne nuk mund ta lejojmë këtë. Ne u jepnim 4 miliardë dollarë, po ua japim ende, por kjo ndërpritet në fund të vitit. Pse? Sepse ata nuk kanë nevojë”, ka deklaruar më tej Trump.
Sinjali – aty ku e vërteta flet para lajmit!
Burimi: Sinjali
