Një iniciativë që nisi shtatë vjet më parë nga një postim në LinkedIn, sot është kthyer në një rrjet që lidh profesionistë, sipërmarrës dhe përfaqësues biznesesh nga vende dhe industri të ndryshme në Zvicër.

Më 29 tetor 2026, në restorantin Amaya në Lucern, u mbajt Swiss Albanian Network Business Dinner, një mbrëmje që bëri bashkë mbi 90 të regjistruar, mes tyre edhe mysafirë që kishin udhëtuar nga Kosova.

Mbrëmja u hap nga presidenti i Swiss Albanian Network (SAN), Florent Hasani, i cili para të pranishmëve rikujtoi fillimet e organizatës.

Historia e SAN nis në vitin 2019, kur një postim në LinkedIn ngriti një pyetje të thjeshtë: a ekziston një rrjet ku shqiptarët që jetojnë dhe punojnë në Zvicër mund të njihen dhe të lidhen mes vete?

Interesimi që pasoi u bë pikënisje për krijimin e Swiss Albanian Network, me synimin që profesionistët të kenë një hapësirë për njohje, bashkëpunim dhe shkëmbim përvojash.

Shtatë vjet më vonë, kjo ide vazhdon të zhvillohet përmes ngjarjeve që sjellin në një vend njerëz nga profesione dhe kultura të ndryshme.

Për historinë e këtij edicioni foli edhe Hyrije Ismaili, organizatore e Swiss Albanian Network Business Dinner.

Sipas saj, koncepti u zhvillua edhe nga iniciativa e Betrim Shabanit për të krijuar një takim mes njerëzve të suksesshëm profesionalisht, por në një ambient pa formalitete dhe barriera të panevojshme.

Ideja më pas u bashkua me Swiss Albanian Network, duke marrë formën e një Business Dinner ku njohjet profesionale dhe bisedat mes pjesëmarrësve do të ishin në qendër të mbrëmjes.

Ismaili tregoi para të pranishmëve se realizimi i një ngjarjeje me këtë frymë kishte qenë edhe një synim personal i saj, ndërsa momenti u përcoll me duartrokitje nga pjesëmarrësit.

Networking përtej kartë-vizitave

Një nga elementet që karakterizoi mbrëmjen ishte profili i larmishëm i pjesëmarrësve. Shqiptarë dhe joshqiptarë, sipërmarrës, profesionistë dhe përfaqësues kompanish nga pjesë të ndryshme të Zvicrës patën mundësi të krijojnë kontakte dhe të shkëmbejnë përvoja në një atmosferë më të hapur.

Në vend të një formati klasik biznesi, organizatorët synuan që komunikimi të zhvillohej në nivel të barabartë, duke e vendosur fokusin te njerëzit dhe mundësitë që mund të krijohen përmes njohjeve të reja.

Interesimi me mbi 90 të regjistruar dhe pjesëmarrja nga Zvicra e Kosova tregojnë edhe potencialin që ngjarje të tilla kanë për të forcuar lidhjet mes komunitetit profesional shqiptar dhe partnerëve të tij.

Swiss Albanian Network Business Dinner përfundoi kështu si një mbrëmje takimesh dhe njohjesh të reja, duke vazhduar misionin me të cilin SAN nisi: krijimin e lidhjeve që mund të hapin rrugë për bashkëpunime të reja profesionale dhe biznesore.