Suksesi i një fëmije nuk matet vetëm me notat e mira apo arritjet në shkollë.

Po aq të rëndësishme janë inteligjenca emocionale, vetëbesimi dhe aftësia për të përballuar situata të ndryshme në jetë.

Fëmijët mësojnë shumë edhe duke vëzhguar sjelljen e prindërve, mënyrën si ata marrin vendime, vendosin kufij dhe përballen me vështirësitë. Sipas YourTango, janë shtatë mësime të rëndësishme që nënat mund t’ua përcjellin fëmijëve përmes shembullit të tyre.

1. Të jesh i mirë nuk do të thotë të lejosh të tjerët të përfitojnë prej teje

Fëmijët duhet të mësojnë se mirësia nuk nënkupton të pranosh gjithçka për të shmangur konfliktet. Është e rëndësishme të tregohen të sjellshëm me të tjerët, por edhe të dinë të vendosin kufij dhe të mbrojnë veten kur dikush përpiqet të përfitojë prej tyre.

2. Mos ndiq verbërisht këshillat e të tjerëve

Të dëgjosh mendimet e njerëzve të afërt është e rëndësishme, por kjo nuk do të thotë se duhet të veprosh gjithmonë sipas këshillave të tyre. Fëmijët duhet të mësojnë të analizojnë situatat, të mendojnë në mënyrë të pavarur dhe të marrin përgjegjësi për vendimet e tyre.

3. Jo gjithçka duhet ndarë me të tjerët

Të krijosh marrëdhënie të afërta nuk do të thotë të zbulosh çdo detaj të jetës personale. Fëmijët duhet të kuptojnë se privatësia është e rëndësishme dhe se kanë të drejtë të mbajnë disa mendime apo përvoja vetëm për vete, edhe kur kanë besim te njerëzit përreth.

4. Mos merr vendime të rëndësishme nën ndikimin e emocioneve

Kur janë të zemëruar, të mërzitur apo të zhgënjyer, njerëzit mund të marrin vendime për të cilat pendohen më vonë. Prandaj, fëmijët duhet të mësojnë të ndalen, të qetësohen dhe të mendojnë para se të veprojnë. Prindërit mund t’ua mësojnë këtë duke treguar vetë maturi në situata të vështira.

5. Mëso të menaxhosh paratë

Njohuritë financiare janë një aftësi që duhet të zhvillohet që në moshë të vogël. Fëmijët mund të mësojnë rëndësinë e kursimit, planifikimit të shpenzimeve dhe përgatitjes për të papriturat duke parë mënyrën se si prindërit menaxhojnë financat e familjes.

6. Mos hiq dorë nga parimet për t’u pëlqyer të tjerëve

Dëshira për t’u pranuar nga shoqëria mund t’i shtyjë fëmijët të bëjnë gjëra që nuk përputhen me bindjet e tyre. Për këtë arsye, është e rëndësishme të mësojnë të mos ndikohen verbërisht nga presioni i bashkëmoshatarëve dhe të qëndrojnë besnikë ndaj parimeve të tyre.

7. Nuk duhet të të shqetësojë mendimi i të gjithëve

Mendimi i të tjerëve mund të ketë rëndësi, por jo të gjithë duhet të kenë ndikim në mënyrën se si e jetojmë jetën. Neuroshkencëtari Daniel Glaser thekson se nuk bëhet fjalë për të mos u interesuar fare për mendimet e të tjerëve, por për të ditur mendimet e kujt kanë vërtet rëndësi. Fëmijët duhet të ndërtojnë vetëbesim dhe të rrethohen nga njerëz që i pranojnë ashtu siç janë. /Telegrafi/