Më shumë se një e treta e foshnjave të diagnostikuara me alergji ndaj kikirikëve mund të mos e kenë në të vërtetë këtë gjendje shëndetësore. Kështu thuhet në një studim të ri të realizuar në Australi, i cili ka zbuluar se një pjesë e konsiderueshme e këtyre diagnozave mund të jenë të pasakta.
Studimi, i realizuar nga Instituti i Kërkimeve për Shëndetin e Fëmijëve Murdoch (MCRI) dhe Qendra Kombëtare e Ekselencës për Alergjitë (NACE), përfshiu 778 fëmijë nën moshën 18 muajshe, të cilët më parë ishin diagnostikuar me alergji ndaj kikirikëve.
Për të verifikuar diagnozën, fëmijëve iu dhanë sasi gjithnjë e më të mëdha kikirikësh në kushte të kontrolluara spitalore, nën mbikëqyrjen e mjekëve, për të vërejtur nëse organizmi i tyre shfaqte ndonjë reaksion alergjik.
Rezultatet treguan se 65 për qind e fëmijëve patën reagim alergjik, ndërsa 35 për qind nuk shfaqën asnjë reagim. Kjo nënkupton se më shumë se një në tre fëmijë nuk e kishin alergjinë, pavarësisht diagnozës së mëparshme, e cila më pas iu hoq.
Sipas doktorit Tim Brettig, studiues në MCRI dhe drejtues mjekësor i programit ADAPT, konfirmimi i hershëm i diagnozës është i rëndësishëm, pasi u mundëson fëmijëve të shmangin kufizimet e panevojshme në ushqyerje.
“Identifikimi i këtyre fëmijëve që në moshë të hershme u mundëson të shmangin një diagnozë të panevojshme të alergjisë dhe barrën e shmangies së kikirikëve”, ka shpjeguar ai.
Rasti i foshnjës që u diagnostikua me alergji në moshën pesë muajshe
Një nga rastet e përmendura në studim është ai i vogëlushit Arthur, i cili ishte diagnostikuar me alergji ndaj kikirikëve kur ishte vetëm pesë muajsh.
Megjithatë, pas testimit të kryer nën mbikëqyrjen e mjekëve, foshnja nuk shfaqi asnjë reaksion alergjik, duke bërë që diagnoza t’i hiqej.
Nëna e tij, Leah, ka treguar se familja ishte e shqetësuar para testimit, pasi nuk e dinte se si do të reagonte fëmija.
“Është një lehtësim i madh të dimë se Arthur mund t’i tolerojë kikirikët dhe se mund të vazhdojmë përpara pa pasigurinë që sillte dyshimi për alergji”, u shpreh ajo.
Ndërkohë, foshnjat tek të cilat alergjia u konfirmua u përfshinë në një program imunoterapie, që synon të rrisë gradualisht tolerancën e organizmit ndaj kikirikëve përmes marrjes së dozave të vogla ditore, nën mbikëqyrje mjekësore.
Profesoresha Kirsten Perrett, drejtuese e grupit kërkimor në MCRI, ka theksuar se testimi i kontrolluar duhet të merret në konsideratë përpara se një foshnje të nisë këtë trajtim.
“Testimi i ushqimit nën mbikëqyrjen e mjekëve duhet të merret parasysh në mënyrë rutinore për të konfirmuar diagnozën përpara fillimit të imunoterapisë”, ka deklaruar ajo.
Kur duhet të përfshihen kikirikët në ushqimin e foshnjave?
Sipas Kolegjit Amerikan të Alergjisë, Astmës dhe Imunologjisë, përfshirja e hershme e ushqimeve që përmbajnë kikirikë në dietën e foshnjave mund të ndihmojë në uljen e rrezikut të zhvillimit të alergjisë.
Ndryshe nga rekomandimet e mëparshme, të cilat sugjeronin shtyrjen e konsumimit të kikirikëve, udhëzimet aktuale këshillojnë që ushqimet e përshtatshme për moshën, të cilat përmbajnë kikirikë, të fillojnë të përfshihen rreth moshës 4 deri në 6 muaj, në varësi të zhvillimit të foshnjës.
Megjithatë, prindërit duhet të konsultohen me pediatrin përpara se t’i përfshijnë këto ushqime në dietën e fëmijës, veçanërisht në rastet kur ekziston dyshimi për alergji.
Kikirikët e plotë nuk duhet t’u jepen foshnjave, për shkak të rrezikut të ngufatjes. Po ashtu, testimi përmes konsumimit të ushqimit duhet të kryhet vetëm në kushte të kontrolluara mjekësore dhe asnjëherë në shtëpi.
Sinjali – aty ku e vërteta flet para lajmit!
Burimi: Sinjali
