Sipas njoftimit të policisë, rasti ka ndodhur më 1 nëntor, rreth orës 16:15, kur zyrtarët policorë të Stacionit Policor në Zubin Potok kanë ndaluar për kontroll rutinor një automjet me targa vendore.

Automjetin e drejtonte personi A.B., i lindur më 1993, ndërsa pasagjer ishte I.M., i lindur më 1973.

Gjatë kontaktit me policinë, drejtuesi i automjetit ka deklaruar se posedonte armë, të cilat, sipas tij, i kishte gjetur në një thes, disa metra larg vendit ku ishte ndaluar automjeti.

Gjatë kontrollit të automjetit, policia ka gjetur dhe sekuestruar katër armë zjarri: një AK-47 dhe tri armë të llojit M-48.

Me urdhër të Prokurorit të Shtetit, policia ka kryer edhe kontrolle në adresat e banimit të dy personave në Mitrovicë të Jugut, por nuk ka gjetur ndonjë send të kundërligjshëm.

Të dy personat janë intervistuar në cilësinë e të dyshuarve dhe, me urdhër të prokurorit, janë liruar në procedurë të rregullt.

Rasti po hetohet për veprën penale “Mbajtja në pronësi, kontroll ose posedim të paautorizuar të armëve”.

Policia e Kosovës u ka bërë thirrje qytetarëve që, nëse hasin në armë apo mjete të tjera të kundërligjshme, të mos i prekin ato, por ta njoftojnë Policinë në numrin emergjent 192.

Burimi: RTKLive