Sipas njoftimit të Policisë Rajonale të Ferizajt, i riu ishte evidentuar përmes një video-incizimi duke drejtuar një veturë të tipit BMW, me targa vendore, në rrugën “Vëllezërit Gërvalla”.
Video-incizimin, në të cilin shihej shpejtësia e tejkaluar, drejtuesi i veturës e kishte publikuar edhe në rrjetet sociale.
Gjatë verifikimeve, policia ka konstatuar se R.T., 19 vjeç, nuk posedonte patentë shoferi. Ai ka pranuar se ishte personi që drejtonte veturën në momentin e incizimit.
Ndaj tij janë ndërmarrë veprimet përkatëse ligjore dhe është iniciuar kundërvajtje për shqyrtim në gjykatë.
Policia Rajonale e Ferizajt u ka bërë thirrje të gjithë pjesëmarrësve në trafik që të respektojnë kufizimet e shpejtësisë dhe të mos drejtojnë automjete pa patentë shoferi, duke paralajmëruar se sjellje të tilla rrezikojnë drejtpërdrejt jetën dhe sigurinë e qytetarëve.
Burimi: RTKLive
