Komisioni Evropian ka evidentuar në Raportin për Kosovën për vitin 2026 përdorimin e gjuhës së ashpër dhe akuzave ndaj gazetarëve nga zyrtarë të lartë qeveritarë, përfshirë kryeministrin Albin Kurti. Sipas raportit, Kosova ka garanci ligjore për lirinë e shprehjes, por kushtet në të cilat punojnë mediat duhet të përmirësohen.
Gjatë periudhës së mbuluar nga raporti janë regjistruar 35 raste të sulmeve fizike, sulmeve verbale ose kërcënimeve ndaj gazetarëve, një rënie e konsiderueshme krahasuar me vitin paraprak. Raporti përmend pengimin e punës së gazetarëve nga zyrtarë të sigurisë, ngacmimet në internet dhe publikimin e të dhënave personale të gazetarëve.
Komisioni u kërkon zyrtarëve publikë të përmbahen nga deklaratat që shënjestrojnë ose diskreditojnë gazetarët dhe bën thirrje që sulmet dhe frikësimi i tyre të dënohen.
Pronësia e mediave dhe qasja në dokumente publike
Komisioni evidenton mungesë transparence në pronësinë dhe financimin e mediave. Regjistri mbulon vetëm radiot dhe televizionet e licencuara, ndërsa të dhënat për pjesën e tregut që zotëron secili medium nuk janë publike.
Raporti përmend gjithashtu vonesat dhe pengesat me të cilat përballen gazetarët kur kërkojnë dokumente publike, si dhe vështirësitë e mediave në gjuhën serbe për të marrë informacione në atë gjuhë. Pagat e ulëta dhe kontratat afatshkurtra vazhdojnë të ndikojnë në kushtet e punës së gazetarëve.
Sinjali – aty ku e vërteta flet para lajmit!
/GazetaSinjali/
Burimi: Sinjali
