Ish-sulmuesi i Milanit, Antonio Cassano, e ka kritikuar Ronaldinhon për luajtjen në një ndeshje zyrtare 11 vjet pasi u tërhoq nga futbolli profesionist.

Të dielën, braziliani 46-vjeçar luajti si titullar për Ravennën në një ndeshje të Serie C kundër Forlit (2-0). Ronaldinho luajti pjesën e parë dhe u zëvendësua në pushimin mes pjesëve, duke kontribuar në sekuencën sulmuese që çoi në golin e parë të vendasve.
Vlen të përmendet se Ronaldinho më parë kishte fituar një pjesë të aksioneve të klubit, por rikthimi i tij në fushat e blerta po kritikohet shumë nga ish-sulmuesi italian, Cassano.
“Le të filloj me këtë: Unë e vlerësoj shumë Ronaldinhon si njeri dhe si futbollist. E vendos atë midis pesë më të mëdhenjve të të gjitha kohërave, së bashku me Messin, Maradonën, Ronaldon Fenomenin dhe ndoshta Pelen. Ronaldinho është një nga pesë lojtarët më të mirë në histori. Ai pati një karrierë të jashtëzakonshme, duke fituar gjithçka që ishte e mundur për të fituar. Ai bëri diçka unike dhe të mrekullueshme, me një cilësi që nuk ka të barabartë”, ka thënë fillimisht italiani.
“Por, duhet ta ndaj këtë nga ajo që do të them, sepse janë dy gjëra shumë të ndryshme. Kam respekt të madh për disa njerëz dhe ia heq kapelën Ronaldinhos në çdo aspekt, por ajo që bëri ditën tjetër ishte, për mua, një gjë e shëmtuar, e shëmtuar, e shëmtuar për t’u parë”.
“Në moshën 46 vjeç, në atë gjendje, shkon atje për të bërë çfarë? Nuk e kuptoj… A e bëri sepse ka një lidhje me Ciprianin, i cili është miku i tij? A e bëri sepse i dhanë shumë para? A e bëri për… Nuk e di… Për mua, ishte një farsë”, përfundoi Cassano. /Telegrafi/





