Zvicra është ngjitur për tri pozita në renditjen globale të njohurive të gjuhës angleze, duke u renditur e 27-ta në botë. Megjithatë, ky pozicion më i lartë nuk nënkupton përmirësim të aftësive të banorëve, pasi rezultati i përgjithshëm i vendit ka shënuar rënie.

Sipas Indeksit të Aftësisë në Anglisht të EF-së (EF EPI) për vitin 2026, Zvicra ka marrë 557 pikë, shtatë më pak sesa vitin paraprak.
Për përgatitjen e indeksit, shkolla e gjuhëve të huaja EF ka analizuar rezultatet e rreth 2.3 milionë të rriturve nga 117 vende dhe rajone, të cilët gjatë vitit 2025 kanë marrë pjesë në testin falas online EF SET, shkruan Watson.
Megjithatë, EF thekson se renditja nuk është përfaqësuese e të gjithë popullsisë, pasi testin e zhvillojnë kryesisht persona që dëshirojnë të mësojnë anglisht ose të vlerësojnë njohuritë e tyre në këtë gjuhë.
Pavarësisht ngjitjes në vendin e 27-të, Zvicra nuk ka shënuar përparim në pikët e përgjithshme. Pozita më e mirë në renditje shpjegohet me faktin se Maqedonia e Veriut, Bosnja dhe Hercegovina dhe Zambia, të cilat vitin e kaluar ishin renditur më lart, nuk janë përfshirë në indeksin e këtij viti.
Me 557 pikë, Zvicra vazhdon të jetë në kategorinë e njohurive të mira të anglishtes, por vetëm pak mbi pragun e kategorisë mesatare, që fillon nën 550 pikë. Në nivel evropian, vendi renditet i 20-ti.
Suedia merr vendin e parë në botë
Rënia e rezultateve nuk është e kufizuar vetëm në Zvicër. Sipas raportit, 27 nga 33 vendet evropiane kanë marrë më pak pikë në vitin 2026 krahasuar me vitin paraprak, transmeton Telegrafi.
Në nivel global, më shumë se dy të tretat e vendeve kanë shënuar rënie, ndërsa mesatarja botërore ka zbritur nga 488 në 485 pikë.
Suedia është ngjitur në vendin e parë me 615 pikë. Holanda, e cila për vite me radhë ka kryesuar renditjen, këtë vit ka rënë në vendin e pestë, pasi ka humbur 15 pikë.
Ndër vendet fqinje të Zvicrës, Austria renditet e dyta, ndërsa Gjermania e katërta. Italia është në vendin e 31-të dhe Franca në të 36-tin.
Italia, megjithatë, ka shënuar përmirësimin më të madh në botë, me 28 pikë më shumë krahasuar me vitin e kaluar.
Zviceranët kanë më shumë vështirësi në të folur sesa në të lexuar
Për herë të dytë, EF ka vlerësuar veçmas katër aftësitë gjuhësore: leximin, dëgjimin, shkrimin dhe të folurit.
Rezultatet tregojnë se banorët e Zvicrës kanë njohuritë më të mira në lexim, me 582 pikë, ndërsa në dëgjim kanë marrë 554 pikë. Të dyja këto aftësi janë në kategorinë e mirë.
Në anën tjetër, rezultatet në shkrim janë 532 pikë, ndërsa në të folur 512 pikë, duke u klasifikuar në nivelin mesatar.
Dallimi mes leximit dhe të folurit arrin në 70 pikë, çka tregon se aftësitë për të komunikuar në anglisht mbeten më të dobëta sesa ato për të kuptuar tekstet e shkruara, përcjell Telegrafi.
Megjithatë, në këtë drejtim Zvicra ka shënuar përmirësimin më të madh, me 31 pikë më shumë në aftësinë e të folurit. Një vit më parë, rezultati në këtë kategori ishte vetëm 481 pikë, që e vendoste vendin në nivelin e ulët.
“Besimi në të folur vjen nga të folurit”, ka thënë Laurent Morel, drejtor menaxhues i EF Zvicër.
Të rinjtë shënojnë rënie, të moshuarit përmirësohen
Të dhënat sipas grupmoshave tregojnë një zhvillim të ndryshëm mes të rinjve dhe të rriturve.
Personat mbi 40 vjeç kanë shënuar rritje prej 24 pikësh, duke arritur në 525 pikë. Ndërsa grupmosha nga 31 deri në 40 vjeç është përmirësuar me 14 pikë, duke arritur në 567 pikë.
Në të kundërt, të rinjtë e moshës 18 deri në 20 vjeç kanë humbur 11 pikë, duke zbritur në 556 pikë.
Grupmosha nga 26 deri në 30 vjeç vazhdon të ketë rezultatet më të mira, me gjithsej 582 pikë.
Cyrihu kryeson renditjen brenda Zvicrës
Sa u përket rajoneve gjuhësore, Zvicra gjermanishtfolëse ka rezultatet më të mira, duke u klasifikuar në kategorinë e njohurive të mira të anglishtes. Pas saj renditen Zvicra frëngjishtfolëse dhe ajo italishtfolëse, të cilat kanë rezultate mesatare. Rajoni italishtfolës ka marrë 527 pikë.
Në renditjen sipas kantoneve, Cyrihu kryeson me 596 pikë, i ndjekur nga Aargau me 581 dhe St. Gallen me 567 pikë.
Në fund të listës janë Fribourg dhe Ticino, me nga 527 pikë secili.
Këtë vit, EF ka përfshirë në renditje vetëm nëntë kantone, pasi për vlerësim kërkohen të paktën 100 persona që kanë marrë pjesë në test. Për këtë arsye, në listën e këtij viti mungon edhe Basel-Stadt, i cili vitin e kaluar kishte kryesuar me 616 pikë. Jashtë renditjes kanë mbetur gjithashtu Zug, Basel-Landschaft, Thurgau dhe Schwyz.
Edhe në kategorinë e qyteteve, Cyrihu mban vendin e parë, me 620 pikë, rezultat që e vendos në nivelin shumë të mirë të njohjes së anglishtes.
Pas tij renditet Berna me 601 pikë, ndërsa Lucerna ka marrë 599 pikë dhe ka mbetur pak nën këtë kategori.
Lozana ka shënuar 574 pikë, ndërsa Gjeneva 563, duke u renditur në kategorinë e njohurive të mira.
Bazeli dhe Winterthuri, të cilat ishin pjesë e renditjes vitin e kaluar, nuk janë përfshirë këtë herë, pasi edhe për qytetet kërkohet pjesëmarrja e së paku 100 personave në test./Telegrafi/





