Zonja e Parë e SHBA-së u shfaq me dy kombinime krejtësisht të ndryshme brenda pak ditësh, duke dëshmuar se eleganca klasike dhe tendencat moderne mund të ndërthuren me shumë stil
Zonja e Parë e Shteteve të Bashkuara të Amerikës, Melania Trump, ka tërhequr sërish vëmendjen me zgjedhjet e saj të modës. Brenda vetëm disa ditësh, 56-vjeçarja mori pjesë në dy aktivitete të rëndësishme publike, ku u shfaq me kombinime që bashkojnë elegancën e përmbajtur, ngjyrat e ngrohta të vjeshtës dhe aksesorët mbresëlënës.
Më 12 nëntor, Melania Trump vizitoi shkollën fillore Ellis D. Parker, në bazën ushtarake Fort Rucker, në Alabama. Ajo shoqërohej nga Zonja e Dytë e SHBA-së, Usha Vance, me të cilën takoi nxënësit dhe bisedoi për rëndësinë e arsimit.
Gjatë vizitës, Melania vlerësoi veçanërisht mësimdhënësit që përdorin teknologjinë bashkëkohore në procesin mësimor, në kuadër të nismës së saj Fostering the Future.
Vizita ishte pjesë e një aktiviteti më të gjerë kushtuar mirënjohjes ndaj ushtarakëve amerikanë dhe mbështetjes së familjeve të tyre.
Çizmet deri te gjuri dhe eleganca në nuancat e tokës
Për këtë rast, Melania Trump zgjodhi një kombinim në stil ushtarak, por me një interpretim elegant dhe bashkëkohor.
Ajo veshi një xhaketë me jakë të ngritur dhe xhepa të theksuar, të cilën e kombinoi me një bluzë ngjyrë kafe me jakë të lartë dhe pantallona në nuanca të ngjashme.
Vëmendjen më të madhe e tërhoqën çizmet prej kamoshi deri te gjuri, me taka të larta, që i dhanë veshjes një karakter veçanërisht elegant.
Çizmet e këtij modeli janë ndër zgjedhjet më të spikatura të modës së vjeshtës. Ato kombinohen lehtësisht me funde midi, fustane të thurura, pantallona të ngushta apo pallto klasike.
Ndërkohë, Usha Vance zgjodhi një paraqitje më të thjeshtë, me triko të zezë, pantallona ngjyrë blu të errët dhe këpucë balerina.
Edhe pse me stile të ndryshme, të dyja dëshmuan se eleganca nuk kërkon domosdoshmërisht kombinime të ndërlikuara.
Xhaketa bomber dhe fundi në ngjyrë vaniljeje që morën gjithë vëmendjen
Disa ditë më parë, më 7 nëntor, Melania Trump kishte vizituar Universitetin Shtetëror të Luizianës (LSU), një nga institucionet e njohura arsimore dhe sportive në SHBA.
Për këtë aktivitet, ajo zgjodhi një kombinim që tërhoqi menjëherë vëmendjen e dashamirësve të modës: xhaketë bomber ngjyrë kafe dhe fund midi në ngjyrë vaniljeje.
Gjatë vizitës, Melania mori pjesë në shpalljen e një fondi bursash prej 7.2 milionë dollarësh për të rinjtë që kanë qenë në sistemin e kujdesit familjar. Më pas ndoqi ndeshjen e futbollit amerikan ndërmjet LSU-së dhe Alabamës.
Xhaketa bomber, e realizuar nga marka Nour Hammour, sipas raportimit të medias serbe kushton rreth 1.540 dollarë.
Melania e kombinoi me një fund elegant, me prerje të strukturuar dhe gjatësi midi, të krijuar nga stilisti Adam Lippes.
Kontrasti ndërmjet xhaketës me karakter sportiv dhe fundit elegant krijoi një kombinim modern, por njëkohësisht të rafinuar.
Veshjen e plotësoi me këpucë metalike me taka shumë të larta, të markës Manolo Blahnik dhe syze të errëta dielli.
Gjatë ceremonisë, presidenti i LSU-së, Wade Rousse, i dhuroi Zonjës së Parë një fanellë sportive me emrin e saj dhe numrin 14, si dhe një helmetë me logon e nismës së saj Be Best.
Dy paraqitjet e fundit tregojnë qartë stilin që Melania Trump preferon: prerje klasike, ngjyra të harmonizuara dhe një element që e bën të veçantë të gjithë veshjen.
Qoftë me çizme kamoshi e xhaketë ushtarake, qoftë me fund midi dhe xhaketë bomber, ajo vazhdon të mbetet një nga figurat publike, zgjedhjet e së cilës në modë tërheqin vazhdimisht vëmendje. /Telegrafi/
