Gjykata Themelore në Prishtinë, përmes Departamentit Special, ka caktuar të enjten, më 5 nëntor, masën e paraburgimit prej një muaji në rastin “Rikthimi”, ku u sekuestruan mbi 37 kilogramë substancë e dyshuar narkotike e llojit heroinë.
Gazeta Sinjali raportoi ekskluzivisht më 4 nëntor për operacionin dhe publikoi emrat e pesë të arrestuarve. Të dyshuar në këtë rast janë Skender Sale, Faton Sopa, Ali Cezoroglu, Agron Elezi dhe Veton Sopa.
Vendimi u mor pas seancës dëgjimore në Pallatin e Drejtësisë. Gjatë seancës, jashtë objektit kishte masa të shtuara sigurie.
Operacioni “Rikthimi” u zhvillua më 3 nëntor në rajonet e Ferizajt dhe të Prishtinës. Aksioni u krye nga Policia e Kosovës, me urdhër të Prokurorisë Speciale dhe me mbështetjen e Agjencisë së Kosovës për Inteligjencë.
Gjatë aksionit u arrestuan pesë persona dhe u sekuestruan 37 kilogramë e 332 gramë të substancës së dyshuar, të ndarë në 62 paketime. Vlera e saj në treg vlerësohet në rreth 550 mijë euro.
Hetuesit dyshojnë se ngarkesa ishte nisur nga Irani dhe kishte mbërritur në Kosovë e fshehur mes mallrave komerciale.
Shënim: Personat e apostrofuar në këtë artikull prezumohen të pafajshëm derisa fajësia e tyre të vërtetohet me aktgjykim të formës së prerë.
Sinjali – aty ku e vërteta flet para lajmit!
Burimi: Sinjali
