Barcelona ka marrë një lajm shqetësues nga grumbullimi i Kombëtares së Spanjës, pasi mbrojtësi i saj i ri, Pau Cubarsí, ka pësuar probleme fizike në ndeshjen kundër Anglisë.

19-vjeçari u detyrua të largohej nga fusha në pushimin mes pjesëve, në përballjen e zhvilluar të dielën, të cilën Spanja e humbi me rezultat 3:2.
Sipas raportimit të mediumit spanjoll “Mundo Deportivo”, mbrojtësi i Barcelonës ka ndier dhimbje në zonën e ijeve, për çka përzgjedhësi Luis de la Fuente vendosi të mos rrezikonte me aktivizimin e tij në pjesën e dytë.
Pas përfundimit të ndeshjes, De la Fuente bëri të ditur se shqetësimi nuk dukej serioz, por nevojiten ekzaminime të mëtejshme për të përcaktuar nëse bëhet fjalë për ndonjë lëndim.
Cubarsí pritet të rikthehet në Barcelonë të hënën, ku do t’i nënshtrohet kontrolleve mjekësore nën mbikëqyrjen e stafit të klubit.
Lajmi vjen në një moment delikat për trajnerin Hansi Flick, pasi Barcelona ka pasur probleme me lëndimet në repartin defensiv. Mungesa eventuale e Cubarsít do të ishte një tjetër goditje për planet e teknikut gjerman.
Mbrojtësi 19-vjeçar është shndërruar në një prej futbollistëve të rëndësishëm të Barcelonës, duke fituar besimin e Flickut falë paraqitjeve të tij në qendër të mbrojtjes.
Për momentin, Barcelona pret rezultatet e ekzaminimeve për të kuptuar shkallën e problemit fizik dhe kohën e mundshme të rikuperimit.
Sinjali – aty ku e vërteta flet para lajmit!
Burimi: Sinjali





