Qamile Marra, gruaja shqiptare që pretendohet të jetë personi më i moshuar në botë, është zbuluar se nuk përdor asnjëherë ilaçe, madje as për dhimbje koke.

Gazetari Blendi Fevziu ka realizuar një tjetër intervistë me 117-vjeçaren, e cila është lindur më 19 gusht të vitit 1909, si dhe me renë e saj. Kjo e fundit tregoi se Qamile Marra nuk merr kurrë ilaçe, madje as aspirinë për dhimbje koke.

Gjatë intervistës, 117-vjeçarja zbuloi edhe disa nga ushqimet që konsumon, duke përmendur dhallin, kosin, lakrat dhe fasulet.

Historia e saj ka tërhequr vëmendjen e mediave ndërkombëtare dhe është bërë virale në rrjetet sociale. Pas interesimit për moshën e saj të pazakontë, Marra është intervistuar edhe nga media prestigjioze, si BBC dhe Agjencia France-Presse (AFP).

Nëse datëlindja e saj konfirmohet zyrtarisht, ajo do të ishte dy ditë më e moshuar se britanikja Ethel Caterham, e cila njihet nga Guinness World Records si personi më i moshuar në botë që është ende gjallë.

E lindur gjatë periudhës së sundimit osman, Marra ishte 36 vjeçe në vitin 1945, pak para përfundimit të Luftës së Dytë Botërore.

Ajo e ka kaluar pothuajse të gjithë jetën në një fshat të Shqipërisë, ku është marrë me kultivimin e ushqimeve dhe kujdesin për bagëtinë, thuhet në raportimin e AFP-së.

E rrethuar nga pemët frutore dhe natyra, 117-vjeçarja ka ruajtur ndër vite një mënyrë jetese të lidhur ngushtë me punët e fshatit dhe ushqimet tradicionale.