Ministri i Shëndetësisë (MSH), Sasho Klekovski, sot mbajti fjalim në hapjen e diskutimit në panel me temë „Sëmundja e Parkinsonit dhe sëmundja e Alzheimerit: trajtim më i mirë për një jetë më cilësore“, i cili u mbajt në Dekanatin e Fakultetit të Mjekësisë në Shkup, thuhet në njoftimin e MSH-së.

Nga atje njoftojnë se neurologë dhe neurokirurgë nga Qendra Klinike Universitare në Lubjanë dhe nga klinikat universitare në Shkup diskutuan mbi stimulimin e thellë të trurit (DBS) për trajtimin e sëmundjes së Parkinsonit, si dhe mbi terapitë antiamiloide me barnat lekanemab dhe donanemab në fazën e hershme të sëmundjes së Alzheimerit.

Gjithashtu, u diskutuan parakushtet për futjen dhe zbatimin e këtyre terapive në Maqedoni.

“Sëmundja e Parkinsonit dhe sëmundja e Alzheimerit nuk janë thjesht diagnoza. Ato përfaqësojnë vite të tëra të jetës së pacientit dhe të familjes që kujdeset për të. Asnjëra prej këtyre terapive nuk është e përshtatshme për të gjithë. Të dyja kërkojnë përzgjedhje të kujdesshme të pacientëve, ekipe të trajnuara, diagnostikim dhe ndjekje afatgjatë. Prandaj, çështja nuk është vetëm nëse duhet të zbatohen, por si të zbatohen: në mënyrë të sigurt, profesionale dhe të qëndrueshme”, deklaroi Klekovski.

Nga atje shtojnë se në sistemin shëndetësor kombëtar janë të regjistruar rreth 24.000 persona me demencë, ndërsa vlerësimet tregojnë se deri në vitin 2050 ky numër mund të rritet pothuajse trefish. Rreth 8.000 qytetarë jetojnë me sëmundjen e Parkinsonit, shumica prej të cilëve marrin përkujdesje në kushte shtëpiake, nga familjet e tyre.

Ministri theksoi se Ministria është e gatshme të dëgjojë mendimin e ekspertëve dhe pret që nga ky diskutim të dalin rekomandime konkrete lidhur me atë që mungon, renditjen e hapave të nevojshëm dhe afatet kohore për realizimin e tyre./Telegrafi/