“Mbrojtjen e jetës personale dhe familjare të Jeton Sylajt” e ka përmendur mes arsyetimeve Gjykata Themelore në Pejë, në vendimin për mbylljen e seancës që pritet të mbahet të enjten.
Sylaj do të dalë para gjykatës në seancë fillestare në rastin ku është i akuzuar për kanosjen e Arlindes sa ishte gjallë.
Në dokumentin e ka siguruar nga Dukagjini, thuhet se mbyllja po bëhet me kërkesë të Prokurorisë Themelore në Prishtinë.
“Në rastin konkret, gjykata ka marrë parasysh se vepra penale për të cilën është ngritur aktakuza, përkatësisht “Kanosja” nga neni 181 paragrafi 2 i KPRK-së, dyshohet se është kryer në kuadër të marrëdhënieve familjare dhe ndaj një anëtari të familjes. Për rrjedhojë, gjatë shqyrtimit gjyqësor pritet të trajtohen rrethana që ndërlidhen drejtpërdrejt me jetën personale dhe familjare të të pandehurit, të palës së dëmtuar dhe të familjarëve të tyre. Po ashtu, nga përmbajtja e provave të propozuara për administrim rezulton se një pjesë e tyre përmbajnë të dhëna të ndjeshme lidhur me marrëdhëniet brenda familjes, deklarimet personale të personave të përfshirë në procedurë, si dhe informacione që kanë të bëjnë me fëmijën e mitur A.S.”.
Tutje gjykata në Pejë e ka arsyetuar vendimin e saj edhe me mbrojtjen e fëmijës së Arlindës që është ende i mitur.
“Gjykata, në këtë kontekst, i ka kushtuar rëndësi të veçantë edhe interesit më të mirë të fëmijës së mitur A.S., duke vlerësuar se mbrojtja e identitetit, privatësisë dhe mirëqenies së tij duhet të jetë një konsideratë me rëndësi të veçantë gjatë zhvillimit të procedurës. Kjo është veçanërisht e rëndësishme për faktin se në shkresat e lëndës gjenden raporte të bashkëbisedimeve me të miturin, raport psikologjik dhe materiale të tjera që mund të përmbajnë informacione të ndjeshme për jetën e tij personale dhe familjare.”
Arlinda Zekaj e cila u vra nga ish kunati i saj muajin e kaluar, kishte denoncuar ish burrin e saj, për shkelje të urdhërit mbrojtës.
Para se të vritej, ajo u kishte shkruar të gjitha instutucioneve përfshirë edhe Gjykatës në Pejë, duke iu treguar për rrezikun që i kanosej edhe nga familjarët e ish bashkëshortit./TVDUKAGJINI
Burimi: Dukagjini
