Këngëtarja e njohur, Jennifer Lopez, ka tërhequr vëmendjen me paraqitjen e saj të guximshme gjatë një performance në New York.

Ajo performoi të martën në Bilt Town Square në The Met, ku prezantoi këngën e saj të re “Proof of Love”, ndërsa interpretoi edhe disa nga hitet e njohura, përfshirë “Waiting for Tonight” dhe “On the Floor”.

Përveç muzikës, vëmendjen e mori edhe veshja e saj: një kombinezon i ngushtë, i tejdukshëm dhe i zbukuruar me kristale, i cili i mbulonte trupin nga qafa deri te kyçet e këmbëve.

Lopez e kishte kombinuar atë me një varëse të madhe shkëlqyese, vathë të gjatë dhe flokë të lëshuar në valë.

Edhe valltarët e saj kishin veshje prej materiali rrjetë, duke krijuar një paraqitje të harmonizuar me këngëtaren në skenë.

Paraqitjet provokuese të Jennifer Lopez ndër vite kanë nxitur shpesh diskutime në rrjetet sociale, ku një pjesë e publikut e ka lavdëruar për guximin dhe vetëbesimin, e të tjerë kanë kritikuar zgjedhjet e saj të modës, duke vënë në pikëpyetje nëse veshjet e tilla janë të përshtatshme për moshën e saj.

Megjithatë, këngëtarja duket se nuk shqetësohet nga komentet.

Gjatë një koncerti në Las Vegas, në mars, kur u përball me kritika për një kombinezon të tejdukshëm, ajo iu përgjigj me humor atyre që pyesnin pse vishej në atë mënyrë, duke thënë se ende nuk e kuptonte se për çfarë po flisnin. /Telegrafi/