Deputetja e Lidhjes Demokratike të Kosovës, Hykmete Bajrami, është përplasur në Kuvend me deputetin e Lëvizjes Vetëvendosje, Vigan Qorrolli.

Gjatë debatit, Bajrami i kërkoi Qorrollit që të mos hyjnë në jetën personale të njëri-tjetrit, por më pas ia rikujtoi raportimet mediale të viteve të kaluara, sipas të cilave ai ishte kapur me telefon gjatë provimit të jurisprudencës në Universitetin e Prishtinës.

“Sa i përket Universitetit të Prishtinës, të kisha lutur të mos hyjmë në jetën tonë personale, sepse po të hyjmë në atë punë, duhet të flasim se si je zënë në flagrancë me njëfarë provimi. Po më vjen keq”, deklaroi Bajrami.

Pas kësaj deklarate, Qorrolli iu kundërpërgjigj deputetes së LDK-së, duke pretenduar se ajo po reagonte për shkak të së kaluarës së saj në qeverisje.

“Unë e kuptoj ku e ka dhimbjen Bajrami, sepse në shumë qeveri ka shërbyer si ministre dhe asnjë mandat pa skandale nuk e ka përfunduar”, deklaroi Qorrolli.

Ndryshe, ndaj Vigan Qorrollit ndër vite ka pasur raportime në disa media lidhur me pretendimet se ishte përjashtuar nga provimi i jurisprudencës pasi ishte zënë duke përdorur telefonin gjatë testimit.

Burimi: Insajderi