Gara për kontrollin e Senatit pritet të jetë veçanërisht e ngushtë, ndërsa ekonomia dhe rritja e çmimeve të karburanteve janë ndër çështjet kryesore që po ndikojnë në fushatë.

Qendrat e votimit janë hapur në Florida, Delaware, Xhorxhia, Ilinois, Luiziana, Merilend, Masaçusets, Miçigan, Misuri, Pensilvani, Rod-Ajlend, Karolina e Jugut dhe në kryeqytetin Uashington. Votimi kishte nisur më herët edhe në disa shtete të tjera të bregdetit lindor, përfshirë Mainin dhe Ohajon. Orari i hapjes së qendrave përcaktohet nga autoritetet e secilit shtet.

Sipas të dhënave të Laboratorit Zgjedhor të Universitetit të Floridës, deri në orën 23:30 të së hënës, sipas kohës lindore, ishin regjistruar mbi 58.6 milionë vota të hershme. Rreth 31.9 milionë qytetarë kishin votuar personalisht, ndërsa 26.8 milionë përmes postës.

Ndërkohë, sipas Qendrës për Inovacion dhe Hulumtim Zgjedhor, 97 për qind e votuesve me të drejtë vote jetojnë në zona ku mund të votohet edhe para ditës zyrtare të zgjedhjeve.

Republikanët aktualisht kontrollojnë të dyja dhomat e Kongresit, Dhomën e Përfaqësuesve dhe Senatin. Sondazhet sugjerojnë se demokratët kanë mundësi të fitojnë shumicën në Dhomën e Përfaqësuesve, ndërsa gara për Senatin mbetet më e pasigurt.

Ndër shtetet që mund të përcaktojnë kontrollin e Senatit janë Alaska, Maini, Teksasi, Kansasi dhe Miçigani.

Presidenti Donald Trump, i cili nuk është kandidat në këto zgjedhje, u ka bërë vazhdimisht thirrje votuesve që ta trajtojnë votimin sikur emri i tij të ishte në fletëvotim. Ai shpreson që mbështetja ndaj tij të ndihmojë kandidatët republikanë. Megjithatë, historikisht, partia që mban pushtetin në Shtëpinë e Bardhë shpesh pëson humbje në zgjedhjet e mesmandatit.

Në Florida, 19 qendra votimi janë zhvendosur përkohësisht për shkak të përmbytjeve. Guvernatori Ron DeSantis ka shpallur gjendje të jashtëzakonshme në disa qarqe, duke u mundësuar autoriteteve zgjedhore të ndryshojnë lokacionet e qendrave kur ato bëhen të pasigurta ose të paarritshme.

Një tjetër shqetësim për votuesit janë çmimet e karburanteve. Një gallon benzinë kushtonte mesatarisht 4.15 dollarë, çmimi më i lartë i regjistruar ndonjëherë në ditën e zgjedhjeve.

Sipas një sondazhi të gazetës The New York Times dhe Universitetit Siena, afro tri të katërtat e votuesve nuk e miratojnë mënyrën se si presidenti Trump po e trajton këtë çështje.

Burimi: RTKLive