Forca e Sigurisë së Kosovës ka reaguar publikisht pas raportimit ekskluziv të Gazetës Sinjali lidhur me incidentin e rëndë të ndodhur gjatë ushtrimeve ushtarake në poligonin e Babajt të Bokës, ku shpërthimi i municionit 40-milimetresh turk brenda granatahedhësit automatik amerikan MK-19 rrezikoi jetën e një ushtari kosovar.
Në komunikatën e saj zyrtare, FSK e ka konfirmuar incidentin, duke sqaruar se rasti ka ndodhur më herët gjatë trajnimeve ushtarake dhe se pjesëtari i saj ka pësuar vetëm lëndime të lehta.
Nga FSK theksojnë se trajnimet me municion luftarak bartin në vete rrezikshmëri të lartë, por pretendojnë se merren të gjitha masat paraprake për menaxhimin e rrezikut, përfshirë pajisjet mbrojtëse individuale dhe kolektive.
Po ashtu, sipas procedurave standarde në fuqi, FSK njofton se çdo aktiviteti i bashkëngjiten ekipet mjekësore për evakuim potencial, duke garantuar se të gjitha masat e zbatuara janë në linjë me standardet e mbrojtjes të NATO-s.
“FSK është e vetëdijshme që profesioni ushtarak përbën në vete një rrezikshmëri të lartë në përmbushje të misionit kushtetues dhe ligjor. Megjithatë, në relacion me nivelin e aktiviteteve, numri i aksidenteve mbetet i vogël për shkak të masave të sigurisë,” thuhet ndër të tjera në reagimin e tyre.
Kujtojmë se Sinjali publikoi me pamje incidentin e ndodhur në muajin shtator, derisa burime brenda ushtrisë ngritën shqetësime se i njëjti municion turk kishte shfaqur defekte edhe në raste të tjera të mëparshme.
Sinjali – aty ku e vërteta flet para lajmit!
Burimi: Sinjali
