Në pamje të parë, një krijim i bardhë elegant, por nga një kënd tjetër zbulohej një konstruksion aq i pazakontë, sa dukej sikur sfidonte edhe gravitetin
Modelja e njohur Emily Ratajkowski tërhoqi vëmendjen në galanë prestigjioze LACMA Art+Film, të mbajtur më 7 nëntor në Los Angeles, duke u shfaqur me një fustan të bardhë Gucci, i cili sfidonte çdo përfytyrim tradicional për veshjet elegante të mbrëmjes.
Krijimi, i realizuar nga shtëpia italiane e modës nën drejtimin kreativ të Demna-s, ishte një ndërthurje e guximshme e elegancës, sensualitetit dhe dekonstruksionit, ku pjesët e zbuluara të trupit bëheshin element po aq të rëndësishëm sa vetë materiali.
Një qepje e vogël që mbante pothuajse gjithçka
Ajo që e bënte këtë fustan veçanërisht të pazakontë nuk ishte vetëm prerja provokuese, por mënyra se si ishte ndërtuar.
Modeli asimetrik kishte një dekolte të thellë, pjesët anësore pothuajse tërësisht të hapura dhe një të çarë dramatike që ngjitej deri pranë belit, duke zbuluar pothuajse të gjithë këmbën.
Megjithatë, detaji më befasues ndodhej në njërën anë të ijëve, ku dy pjesët e materialit bashkoheshin vetëm përmes një qepjeje të vogël. Ky element minimalist krijonte përshtypjen se fustani mezi qëndronte në vend.
Prerja e pazakontë ekspozonte edhe pjesët anësore të gjoksit, duke e bërë veshjen një nga interpretimet më të guximshme të modës së ashtuquajtur naked dress, që prej vitesh është bërë pjesë e paraqitjeve të personazheve të famshëm në tapetin e kuq.
profimedia
Një detaj Gucci që plotësonte gjithë krijimin
Pjesa e sipërme e fustanit ishte formuar me rripa të përdredhur rreth qafës, të cilët krijonin një siluetë asimetrike dhe përfundonin me një zbukurim të argjendtë me logon e njohur Gucci.
Ratajkowski e kombinoi veshjen me sandale metalike ngjyrë argjendi, me rripa të hollë, ndërsa flokët e gjatë ngjyrë kafe i kishte lënë të lëshuar në onde të buta, me ndarje në mes.
Aksesorët e pakët lejonin që gjithë vëmendja të përqendrohej te fustani, i cili, pavarësisht ngjyrës së bardhë dhe materialit të lehtë, ishte larg elegancës tradicionale.
profimedia
Kur veshja bëhet deklaratë mode
Kjo paraqitje është vazhdimësi e stilit të njohur të Emily Ratajkowski-t, e cila shpesh zgjedh krijime transparente, prerje të thella dhe silueta që theksojnë format e trupit.
Për modelen, tapeti i kuq është kthyer në një hapësirë eksperimentimi, ku kufiri ndërmjet veshjes dhe trupit bëhet gjithnjë e më pak i dallueshëm.
Me këtë krijim të Gucci-t, ajo dëshmoi edhe një herë se një fustan nuk ka nevojë për shumë material për të tërhequr vëmendjen. Ndonjëherë, mjafton vetëm një qepje. /Telegrafi/
