Gadi Eisenkot, i cili është ngarkuar me formimin e qeverisë së ardhshme izraelite, ka ftuar partinë e krahut të djathtë “Likud” – të kryeministrit në detyrë Benjamin Netanyahu – për bisedime rreth koalicionit, njoftoi partia e tij.

Partia qendrore “Yashar” e Eisenkotit deklaroi të shtunën se bisedimet, të planifikuara të fillojnë të dielën, pasqyrojnë një “angazhim të sinqertë për të formuar një qeveri sa më gjithëpërfshirëse”.
Ish-shefi i ushtrisë, Eisenkot, ka kohë deri muajin e ardhshëm për të formuar një qeveri që do të zëvendësojë atë të Netanyahut, pasi zgjedhjet e tetorit nuk prodhuan një shumicë të qartë për asnjërin nga blloqet politike.
Njoftimi i së shtunës vjen në një kohë kur kampi i gjerë i Eisenkotit përballet me përçarje: a duhet të krijohen aleanca me partitë ultra-ortodokse, me listat që përfaqësojnë shumicën arabe, apo duhet formuar një qeveri e unitetit kombëtar me bllokun e Netanyahut?
“Në përpjekje për të shqyrtuar çdo mundësi për formimin e një qeverie të re, kreu i partisë ‘Yashar’, Gadi Eisenkot, e ka udhëzuar ekipin negociator të partisë që të ftojë homologët e tyre nga ‘Likud’-i në një seri bisedimesh intensive, duke filluar me takimin e planifikuar tashmë për nesër”, thuhet në deklaratën e partisë.
Ish-kryeministri Naftali Bennett, një figurë e rëndësishme në kampin e Eisenkotit, bëri thirrje të shtunën për një “qeveri uniteti sioniste të udhëhequr nga Eisenkoti” dhe theksoi se partia e tij nuk do të bashkohet me Netanyahun apo bllokun e tij.
Netanyahu bën përpjekje të mëdha për një qeveri uniteti
Netanyahu ka insistuar fuqimisht për një qeveri të unitetit kombëtar, e cila, sipas tij, është e nevojshme për të garantuar “sigurinë” e Izraelit.
Pak kohë pas njoftimit të Eisenkotit, partia “Likud” bëri të ditur qëndrimin e saj lidhur me formimin e një qeverie të tillë me bllokun e Eisenkotit, duke përfshirë kërkesa për ndalimin e “të gjitha sulmeve personale dhe nxitjeve”, si dhe të “bojkoteve” politike kundër Netanyahut dhe qeverisë.
Eisenkot ka lënë të kuptohet se është i hapur për të formuar një qeveri me anëtarë të partisë “Likud” të Netanyahut, por më herët ka përjashtuar mundësinë e shërbimit në një qeveri të udhëhequr nga vetë Netanyahu.
Likud bëri gjithashtu thirrje për një deklaratë të përbashkët, e cila angazhohet për një qeveri uniteti që përfshin “të gjitha partitë që mbështesin ekzistencën e Shtetit të Izraelit si shtet-komb i popullit hebre”, por pa pjesëmarrjen e partive arabe.
Likud propozoi një sërë udhëzimesh për një qeveri uniteti, të cilat përfshijnë: një marrëveshje se Izraeli është shtet-komb i popullit hebre; refuzimin e krijimit të një shteti palestinez; ruajtjen e “zonave të sigurisë” të Izraelit në Siri, Liban dhe Gaza; si dhe një zgjidhje për çështjen e rekrutimit ushtarak të ultra-ortodoksëve, përmes një “marrëveshjeje të gjerë” me udhëheqësit e këtij komuniteti.
Të premten, Eisenkot u zotua se nuk do të lejojë që bisedimet për formimin e koalicionit të zvarriten.
Ai deklaroi se është i gatshëm të propozojë një qeveri të pakicës për emergjencë kombëtare, për ta hedhur në votim në parlament, në rast se dështojnë përpjekjet për krijimin e një qeverie me bazë të gjerë. /Telegrafi/





