Drejtuesi i një sekti fetar në Kenia, Paul Mackenzie, është dënuar me 200 vjet burg për vrasjen e 190 fëmijëve dhe një të rrituri, në një prej tragjedive më të rënda të lidhura me kultet fetare në vitet e fundit.
Vendimi është shpallur nga një gjykatë në qytetin bregdetar të Mombasës, dy javë pasi Mackenzie u shpall fajtor për krimet. Dënimi përfshin 100 vjet burg për vrasje përmes urisë dhe 100 vjet të tjera për vrasje të drejtpërdrejtë.
Sipas prokurorisë, Mackenzie drejtonte kishën “Good News International”, një sekt apokaliptik të krishterë, anëtarët e të cilit urdhëroheshin të mos ushqeheshin dhe të lejonin që edhe fëmijët e tyre të vdisnin nga uria, me besimin se në këtë mënyrë do të shkonin në parajsë përpara fundit të botës.
Sipas hetuesve, bashkëpunëtorët e tij kërcënonin dhe dhunonin viktimat për t’i detyruar të zbatonin këto urdhra. Trupat e pajetë u gjetën në varre të cekëta dhe në gropa, ndërsa disa prej viktimave dyshohet se ishin varrosur të gjalla.
Hetimet nisën në vitin 2023, pasi policia pranoi një denoncim për familje që po i linin fëmijët të vdisnin nga uria në pyllin Shakahola, pranë bregdetit juglindor të Kenias.
Mackenzie u arrestua fillimisht në vitin 2023, ndërsa disa javë më vonë autoritetet nisën gërmimet dhe zbulimin e varreve masive në këtë zonë.
Deri më tani janë nxjerrë mbi 400 trupa, shumë prej të cilëve në gjendje të avancuar dekompozimi. Vetëm 26 prej tyre kanë arritur të identifikohen.
Mackenzie i ka mohuar akuzat për vrasje, duke pretenduar se nuk i kishte detyruar viktimat të vdisnin nga uria. Megjithatë, gjykata nuk e ka pranuar këtë pretendim.
Gjyqtarja Diana Kavedza-Mochache deklaroi gjatë një seance që zgjati më shumë se tetë orë se, në disa raste, fëmijët ishin izoluar dhe u ishte mohuar ushqimi, ndërsa prindërit e tyre i shikonin pa ndërhyrë.
Sinjali – aty ku e vërteta flet para lajmit!
Burimi: Sinjali
