Barcelona ka nisur lëvizjet për të siguruar shërbimet e mbrojtësit të Tottenhamit, Pedro Porro, por fillimisht kërkon që lojtari dhe përfaqësuesit e tij të ndihmojnë në uljen e çmimit të vendosur nga klubi anglez.

Sipas raportimeve të gazetës spanjolle Diario Sport, drejtuesit e Barcelonës kanë qenë në kontakt të vazhdueshëm me përfaqësuesit e Porros, në kuadër të një transferimi të mundshëm gjatë afatit kalimtar të janarit ose verës së ardhshme.

Megjithatë, katalunasit ua kanë bërë të qartë përfaqësuesve të futbollistit se nuk janë të gatshëm të paguajnë 70 milionë euro, shumën që Tottenhami e kërkon për kartonin e tij.

Barcelona dëshiron që fillimisht vetë lojtari dhe rrethi i tij të marrin iniciativën për të negociuar me klubin londinez, me synimin që të arrihet një marrëveshje për një shumë më të përballueshme.

Pedro Porro është në radarët e Barcelonës që nga vera e kaluar, ndërsa vlera e tij në treg është rritur edhe më shumë pas rolit të rëndësishëm që pati me Spanjën në triumfin e saj në Kupën e Botës 2026.

Mbrojtësi 27-vjeçar, nga ana tjetër, thuhet se është i interesuar për një rikthim në La Liga dhe e sheh me dëshirë mundësinë për të veshur fanellën e Barcelonës.

Megjithatë, negociatat nuk pritet të jenë të lehta për katalunasit, pasi Tottenhami ka një pozitë të favorshme në këtë çështje.

Porro nënshkroi kontratë afatgjatë me klubin anglez deri në vitin 2031, në muajin qershor, duke i dhënë Tottenhamit kontroll të madh mbi të ardhmen e tij.

Në Barcelonë, Porro shihet si përforcimi ideal për krahun e djathtë të mbrojtjes, pasi drejtuesit e klubit synojnë të rrisin konkurrencën dhe të përmirësojnë këtë repart, ku Jules Kounde nuk ka bindur me paraqitjet e tij të fundit.

Kështu, mbetet të shihet nëse dëshira e futbollistit për t’u rikthyer në Spanjë do të ndikojë në qëndrimin e Tottenhamit dhe në uljen e çmimit të kërkuar për transferimin e tij. /Telegrafi/