Një anije patrulluese britanike, e vendosur përgjithmonë në Atlantikun Jugor, ka qëlluar 120 predha me municion të vërtetë në ujërat pranë Ishujve Falkland, gjatë një stërvitjeje ushtarake, në kohën kur po shtohen tensionet mes Londrës dhe Buenos Airesit për këtë arkipelag.

Anija HMS Medway, e klasit River, e angazhuar për mbrojtjen e ishujve, ka kryer qitjet me topin e saj automatik 30-milimetërsh. Stërvitja u zhvillua gjatë provave detare, me qëllim certifikimin e ekuipazhit për operacione në vijën e parë.

Ekuipazhi i përshkroi ushtrimet si pjesë të trajnimit rutinë. Në një postim në platformën X, pjesëtarët e anijes shkruan se kishin qëlluar 120 predha dhe se kishin shfrytëzuar rastin për të ushtruar sërish përdorimin e topit automatik 30-milimetërsh, duke theksuar se praktika sjell saktësi.

Kjo stërvitje vjen pas një sërë manovrash të përbashkëta ushtarake në arkipelag, përfshirë operacionin “Southern Vigilance”. Gjatë tij, anija kishte përdorur mitralozë të rëndë përgjatë skajit të Zonës së Ruajtjes së Ishujve Falkland, si dhe kishte zhvilluar ushtrime së bashku me avionë transportues të Forcave Ajrore Mbretërore dhe Regjimentin e Parashutistëve.

Forcat Britanike në Ishujt e Atlantikut Jugor i kanë cilësuar këto dislokime si një masë të rëndësishme parandaluese, që synon të dëshmojë përkushtimin e vazhdueshëm të Londrës për mbrojtjen e këtij territori përballë çdo kërcënimi të mundshëm.

Stërvitjet zhvillohen në një kohë kur Argjentina po intensifikon përpjekjet diplomatike për ishujt, të cilët i quan Malvinas, më shumë se katër dekada pas luftës së vitit 1982, transmeton Telegrafi.

Nën udhëheqjen e presidentit të djathtë, Javier Milei, zyrtarët argjentinas kanë protestuar vazhdimisht kundër lëvizjeve ushtarake britanike në rajon, duke i cilësuar patrullimet e Mbretërisë së Bashkuar si provokime të paligjshme.

Tensionet diplomatike janë shtuar edhe për shkak të fushës së naftës “Sea Lion”, që ndodhet në veri të ishujve dhe vlerësohet të përmbajë rreth 1.7 miliardë fuçi naftë. Nxjerrja e saj pritet të nisë në vitin 2028.

Argjentina ka paraqitur një padi zyrtare në Tribunalin Ndërkombëtar për të Drejtën e Detit në Hamburg, duke kërkuar ndalimin e projektit. Buenos Airesi synon të pengojë shpimet e autorizuara nga Britania dhe ka kërcënuar me sanksione kompanitë energjetike britanike dhe izraelite që marrin pjesë në të.

Ndërkohë, kryeministri britanik, Andy Burnham, ka deklaruar se do të bëjë “gjithçka që nevojitet” për të mbajtur Ishujt Falkland nën sovranitetin britanik. Ai ka këmbëngulur se Mbretëria e Bashkuar do të qëndrojë e palëkundur përballë çdo kërcënimi ndaj ishujve dhe se qëndrimi i tij për këtë çështje nuk do të ndryshojë.

Anija HMS Medway, me një zhvendosje prej rreth 2.000 tonësh, mbetet e vetmja anije e Marinës Mbretërore e vendosur përgjithmonë në këtë rajon.

Ajo është pjesë e pranisë më të gjerë ushtarake britanike në bazën ajrore RAF Mount Pleasant, ku janë të dislokuar edhe avionët luftarakë Typhoon, sistemet e mbrojtjes ajrore Sky Sabre dhe një njësi e përhershme këmbësorie. /Telegrafi/