Në këtë përvjetor, ish-kryetari i AAK-së, Ramush Haradinaj, vlerësoi se rënia e dy heronjve përbën një moment të veçantë në historinë e Kosovës, duke theksuar rëndësinë e qëndresës së tyre.

“Pra, në një mënyrë mund të themi se këta e nisën luftën për çlirimin e Kosovës”, u shpreh Haradinaj, duke rikujtuar edhe mesazhin e tyre për të luftuar për liri deri në flijim.

Edhe kryetari i Prishtinës, Përparim Rama, nënvizoi se sakrifica e Zhitias dhe Fazliut është pjesë e rëndësishme e rrugëtimit drejt lirisë dhe shtetësisë së Kosovës.

“Ne duhet të jemi të bashkuar gjithmonë, duhet ta kujtojmë të kaluarën, ta kuptojmë sakrificën e heronjve tanë, të dëshmorëve tanë, të vendit tonë, në mënyrë që kjo të mos na ndodhë kurrë në të ardhmen”, deklaroi Rama.

Ndërkohë, Fadili, vëllai i Fahri Fazliut, tha se kalimi i viteve nuk e ka zbehur kujtimin për dëshmorët, përkundrazi, i ka bërë ata edhe më të afërt me qytetarët.

“Sa vite më larg, aq më afër janë dëshmorët”, tha ai.

Homazhet e 37-vjetorit rikthyen vëmendjen te sakrifica e Afrim Zhitias dhe Fahri Fazliut, emrat dhe vepra e të cilëve vazhdojnë të përkujtohen si pjesë e historisë së rezistencës për lirinë e Kosovës.

Burimi: RTKLive