Komuna e Podujevës, në bashkëpunim me organizatën “Sharjah Charity International” nga Emiratet e Bashkuara Arabe dhe Shoqatën “Shqiptarët për Shqiptarët”, ka ndihmuar 25 familje në nevojë me nga katër metra kub dru për ngrohje dhe pako ushqimore.

Sipas njoftimit të Komunës së Podujevës, përzgjedhja e familjeve përfituese është bërë nga Drejtoria e Shëndetësisë dhe Mirëqenies Sociale, financimi është siguruar nga organizata nga Emiratet e Bashkuara Arabe, ndërsa realizimi i aktivitetit është bërë nga Shoqata “Shqiptarët për Shqiptarët”.

Po ashtu, në kuadër të këtij aktiviteti, me pako ushqimore janë ndihmuar edhe pesë familje të tjera që jetojnë në lagjen “Shqiptarët për Shqiptarët”.

Ky aktivitet synon të ofrojë mbështetje për familjet në nevojë, duke ua lehtësuar përballimin e shpenzimeve për ngrohje dhe furnizim me ushqime.

Burimi: RTKLive