Një 24-vjeçar nga Kosova, i identifikuar si Abdulla Canaj, është shpallur i zhdukur në Itali. Për të riun nuk ka asnjë informacion që nga pasditja e ditës së djeshme, pasi ai është larguar nga shtëpia në Montorio al Vomano, në provincën e Teramos, dhe nuk është kthyer më.

Sipas njoftimit të autoriteteve, Abdulla Canaj është larguar vullnetarisht nga banesa e tij rreth orës 15:00. Pas humbjes së kontaktit me të, vëllai i tij ka denoncuar rastin në polici, raporton agjencia italiane e lajmeve Ansa.

Kërkimet për gjetjen e 24-vjeçarit janë koordinuar nga Prefektura e Teramos, ndërsa në operacion janë angazhuar zjarrfikësit, karabinierët, policia lokale dhe ekipet e Mbrojtjes Civile. Administrata komunale ka shprehur mirënjohje ndaj prefektit për koordinimin e përpjekjeve të kërkimit.

Përshkrimi fizik dhe veshja në momentin e zhdukjes

Abdulla Canaj ka lindur në provincën e Pescarës dhe jeton në Montorio al Vomano. Ai është rreth 165 centimetra i gjatë, peshon afërsisht 65 kilogramë, ka sy blu, flokë të shkurtër të zinj, mustaqe të vogla dhe një tatuazh në pjesën e pasme të qafës, transmeton Telegrafi.

Në momentin e zhdukjes, ai kishte veshur një bluzë të bardhë me kapuç, një kapuç të kuq, pantallona ngjyrë ushtarake dhe këpucë sportive.

Komuna e Montorio al Vomano, në bashkëpunim me familjen, u ka bërë apel qytetarëve për bashkëpunim maksimal në kërkimin e të riut. Autoritetet kërkojnë që qytetarët të tregojnë kujdes dhe të shmangin përhapjen e informacioneve të paverifikuara.

Apeli për ndihmë

Kushdo që mund ta ketë parë Abdulla Canajn ose ka informacione që mund të ndihmojnë në gjetjen e tij, ftohet të kontaktojë numrin emergjent 112 ose policinë.

Familja dhe autoritetet u bëjnë thirrje të gjithë atyre që kanë ndonjë informacion të mundshëm të ndihmojnë në zbardhjen e rastit dhe gjetjen e 24-vjeçarit kosovar./Telegrafi/