Presidenti amerikan Donald Trump ka shprehur mbështetjen e tij të plotë për atë që ai e quan “Super Inteligjencë” (SI), duke u bërë thirrje shteteve amerikane të përqafojnë këtë teknologji dhe të përfitojnë ekonomikisht prej saj.
“Jam 100% në favor të Super Inteligjencës (SI) dhe do të bashkëpunoj me shtetet e shumta amerikane që duan të bëhen të PASURA duke e pasur atë”, deklaroi Trump.
“Vetëm udhëheqësit e pamend thonë ‘JO’ ndaj pasurisë që sjellin”, shtoi ai.
Deklarata e Trump vjen në kuadër të përpjekjeve të tij për të zëvendësuar termin e njohur “Inteligjencë Artificiale” (AI) me “Super Inteligjencë” (SI), duke ndryshuar mënyrën se si administrata amerikane i referohet kësaj teknologjie.
Trump ka nënshkruar një urdhër ekzekutiv që udhëzon departamentet dhe agjencitë federale të përdorin termin “Super Inteligjencë” në vend të “Inteligjencë Artificiale” në komunikatat zyrtare, faqet e internetit, raportet dhe dokumentet e politikave, për aq sa e lejon ligji.
Më herët, presidenti kishte mbajtur një qëndrim edhe më të ashpër ndaj përdorimit të termit tradicional, duke deklaruar se Shtëpia e Bardhë i konsideron “armiq” ata që vazhdojnë të përdorin shprehjen “Inteligjencë Artificiale” në vend të “Super Inteligjencë”.
Ndërkohë, administrata e tij ka krijuar edhe një strukturë të posaçme të quajtur “Super Intelligence Force”, e cila do të koordinojë qasjen e qeverisë federale ndaj kësaj teknologjie. /Telegrafi/
