Një zjarr i madh që shpërtheu mbrëmë në zonën e Lokva Rogoznicës në Kroaci është përhapur gjatë natës në drejtim të Omishit, duke përfshirë zonat mbi qytet dhe duke iu afruar qendrës.
Flakët kanë rrezikuar banesa dhe objekte të shumta, ndërsa rreth 1 mijë persona janë evakuuar, mes tyre banorë dhe turistë. Një pjesë e tyre janë larguar nga zona edhe me anije.
Sipas autoriteteve, 36 persona kanë kërkuar ndihmë mjekësore, ndërsa 14 janë shtruar në spital. Dhjetë prej tyre ndodhen në kujdes intensiv, ndërsa shtatë janë në gjendje të rëndë.
Zjarri ka shkaktuar dëme të mëdha materiale. Janë dëmtuar ose djegur shtëpi, automjete, objekte turistike dhe biznese. Në disa zona ka pasur edhe ndërprerje të energjisë elektrike. Gjatë natës janë dëgjuar shpërthime të bombolave të gazit, ndërsa sirenat e zjarrfikësve, policisë dhe ekipeve të emergjencës kanë qenë të vazhdueshme.
Kryekomandanti i zjarrfikësve, Slavko Tucakoviq, ka deklaruar se situata është më e qetë, por zjarri ka përfshirë një sipërfaqe prej 900 deri në 1000 hektarësh.
Autoritetet nuk kanë konfirmuar deri tani viktima, por kanë paralajmëruar se nuk përjashtohet mundësia që në zonën e përfshirë nga zjarri të gjenden persona të bllokuar. Aktualisht po kontrollohen shtëpitë dhe zonat e prekura.
Ndërkohë, po vazhdon kërkimi për dy gra, me familjarët e tyre që nuk kanë mundur të kontaktojnë me to. Autoritetet po verifikojnë fillimisht nëse ato janë strehuar në ndonjë nga qendrat e pritjes për të evakuuarit.
Kryeministri kroat Andrej Plenković ka mbërritur në Omish së bashku me disa ministra për të koordinuar me autoritetet lokale, zjarrfikësit, policinë, mbrojtjen civile dhe shërbimet shëndetësore menaxhimin e situatës dhe pasojat e zjarrit.
The post “Shtëpi, makina dhe anije u dogjën” – Zjarri në bregdetin kroat është shuar, pasojat janë të tmerrshme – Kërkohen 2 gra appeared first on Gazeta Express.
