Shoqata e Industrisë së Qumështit të Kosovës (SHIQK) ka bërë të ditur se ka nisur padi ndaj ministrit në detyrë të Bujqësisë, Armend Muja, dhe Agjencisë së Ushqimit dhe Veterinarisë së Kosovës (AVUK), për dëmet që sipas tij, u janë shkaktuar qumështoreve dhe fermerëve vendorë.
Kryetari i SHIQK-së, Gani Durmishi, në një prononcim për KosovaPress, ka thënë se sektori i industrisë së qumështit ndodhet në gjendje të rëndë.
Ndërsa ka akuzuar institucionet përkatëse se me vendimet dhe veprimet e ndërmarra u kanë shkaktuar dëme të mëdha prodhuesve vendorë.
“Jemi në telashe të madhe si sektor i industrisë së qumështit të Kosovës. Fushatën të cilën e ka bërë ministria e bujqësisë dhe tregtisë na ka bërë dëm të jashtëzakonshëm të nivelit të pariparuar neve si industri, njëkohësisht edhe fermerëve.. Ky kokë veti i qiti disa ligje, e proi një vendim dhe menjëherë na dërgoj inspektorat në fabrika, këtu thotë 60 ditë duhet me i kontrollua që me marrë pëlqimin pastaj nga ministria. Inspektorët e ardhur menjëherë na kanë lëshuar një procesverbal na kanë ndërprerë prodhimin”, thotë Durmishi.
Sipas tij, masat kanë prekur edhe eksportin dhe shitjen e produkteve të industrisë vendore të qumështit.
“Të gjitha eksportet e prodhimeve të Kosovës që janë, me ndërhyrje me u ndërpre dhe të mos eksportohen. Ka qitur edhe inspektor në markete, që të hiqen të gjitha produktet nga raftet në markete. Kjo ka qenë shumë e papritur dhe na ka bërë një dëm jashtëzakonisht të madh, na ka dëmtuar edhe me propagandën që gjoja se në Kosovë po prodhohet diçka që është kancerogjene, pa një bazë studimore, të cilën mundet me na prua një dokument”, thotë ai.
Durmishi ka bërë të ditur se qumështoret janë duke evidentuar dhe kalkuluar dëmet e shkaktuara nga tërheqja dhe bllokimi i produkteve në treg.
Ai ka thënë se një pjesë e produkteve rrezikon t’i kalojë afati i përdorimit, ndërsa ka kritikuar mungesën e komunikimit nga institucionet.
“Ende nuk kemi mundur, po i grumbullojmë produktet e bllokuara në markete, jemi duke i kalkuluar edhe në ditë sa kemi mundur të prodhojmë. Gjatë tërheqjes, ato edhe dëmtohen, një pjesë e konsiderueshme mund t’i del afati, me këtë ministër e arrogancë që po paraqitet edhe AVUK nuk po pritet ndonjë zgjidhje. Unë si kryetar i shoqatës, me të gjithë qumështorët, disa herë kemi kërkuar takime gjatë kësaj jave, i kemi dërgua me shkrim ftesën për takime me ministrin, për zgjidhje edhe AVUK, asnjëri nuk është përgjigjur. Do të organizohem të gjithë punëtorët në protesta, edhe fermerët, ata nuk kanë ku ta lënë qumështin, e për ta derdhur për mos t’i ndotur lumenjtë, ndoshta vijnë në Prishtinë këtu i duhet ministrit me ia mbush zyrat. Ne kemi filluar me padi në prokurori speciale, që të ndalojmë këtë vendim me masa të përkohshme dhe po përgatitur dokumentacionet me argumente”, theksoi Durmishi.
Ai paralajmëroi se, nëse nuk arrihet një zgjidhje me Ministrinë e Bujqësisë dhe Ministrinë e Tregtisë, punëtorët e industrisë së qumështit dhe fermerët mund të organizojnë protesta.
Sipas SHIQK-së, procedurat ligjore synojnë ndalimin e vendimit përmes masave të përkohshme, ndërsa shoqata është duke përgatitur dokumentacionin dhe argumentet për dëmet që pretendon se u janë shkaktuar kompanive dhe fermerëve vendorë.
The post SHIQK padit Mujën dhe AVUK-un: Dëmet ndaj qumështoreve dhe fermerëve janë të mëdha appeared first on Gazeta Express.
