Aktorja dhe këngëtarja amerikane Selena Gomez është paditur nga pesë investitorë të Wondermind Global, platformës së shëndetit mendor që ajo bashkëthemeloi me nënën e saj, Mandy Teefey, dhe sipërmarrësen Daniella Pierson.
Investitorët pretendojnë se Gomez nuk i përmbushi zotimet për t’u angazhuar aktivisht në zhvillimin dhe promovimin e markës. Sipas padisë, neglizhimi i pretenduar i detyrimeve nga drejtuesit e kompanisë e ka çuar Wondermind në një gjendje të rëndë financiare.
Paditësit kërkojnë rikthimin e rreth 1.2 milion dollarëve që pretendojnë se kanë investuar në kompani, krahas kompensimit për dëmet dhe shpenzimet ligjore.
Wondermind u themelua rreth pesë vjet më parë nga Gomez, nëna e saj dhe Pierson, me synimin për ta bërë më të qasshme përmbajtjen dhe informacionin mbi shëndetin mendor përmes një platforme digjitale.
Sipas pretendimeve të paraqitura në padi, investitorëve u ishte krijuar përshtypja se kompania kishte në përgatitje një sërë projektesh, përfshirë marrëveshje reklamimi, përmbajtje me personazhe të njohura, një aplikacion dhe iniciativa të tjera. Ata pretendojnë gjithashtu se Gomez kishte marrë përsipër një rol aktiv në marketingun dhe promovimin e kompanisë.
“Gomez pretendoi se kishte nënshkruar një kontratë që e detyronte të angazhohej dhe më pas e injoroi atë”, pretendohet në padi.
Gomez vazhdon të figurojë si bashkëthemeluese në faqen e Wondermind, ndërsa nëna e saj, Mandy Teefey, mban postin e drejtoreshës ekzekutive pas largimit të Daniella Pierson nga kompania.
Mes investitorëve që kanë ngritur padinë është edhe Brent Saunders, drejtues ekzekutiv i kompanisë së kujdesit për sytë Bausch + Lomb.
Paditësit pretendojnë se Wondermind kishte probleme serioze financiare dhe nuk arrinte të përmbushte as disa prej detyrimeve bazë, përfshirë pagesat në kohë ndaj punonjësve dhe furnizuesve. Sipas tyre, disa nga projektet dhe partneritetet e paralajmëruara, përfshirë aplikacionin e Wondermind, nuk u realizuan.
Investitorët thonë gjithashtu se për rreth tre vjet nuk ishin informuar nga themeluesit apo drejtuesit për përkeqësimin e situatës financiare të kompanisë.
Sipas padisë, ata u ndërgjegjësuan për shkallën e problemeve vetëm pas publikimit të një artikulli investigativ nga revista online The Cut në shtator 2025, ku ngriheshin pikëpyetje rreth financave dhe menaxhimit të Wondermind.
Paditësit pretendojnë se problemet e raportuara tregonin se kompania nuk kishte një strategji të qartë për të ardhmen dhe as një plan realist për të arritur vlerësimin financiar që u ishte prezantuar investitorëve.
Pretendimet janë pjesë e një procesi gjyqësor dhe nuk përbëjnë konstatime përfundimtare të gjykatës.
