Ish-deputeti i LDK-së, Adem Salihaj, ka vlerësuar se Lidhja Demokratike e Kosovës aktualisht nuk ka një figurë që mund ta udhëheqë me sukses partinë, duke kërkuar një proces të mirëfilltë të reformimit të brendshëm dhe zgjedhje të drejtpërdrejta për kryetarin.
Sipas tij, asnjëri prej emrave që aktualisht përmenden për drejtimin e LDK-së nuk mund t’i kontribuojë forcimit të partisë.
“Unë mendoj se në kryesin e LDK-së, nuk është një person që mund ta luante me sukses rolin e liderit, pra LDK-ja momentalisht për fat të keq nuk e ka një person që do të mund ta udhëheq me sukses LDK-në… LDK duhet ta bëjë një lëvizje të brendshme, zgjedhor pa u ngutur në mënyrë që ky proces ta zgjedh një lider. Unë mendoj që kryetari i LDK-së nuk do duhej të zgjidhej në Kuvendin e LDK-së, por duhej të zgjidhej me një votë të drejtpërdrejtë të anëtarësisë së LDK-së”, tha Salihaj në emisionin “Ditari” në Tëvë1.
Ai shtoi se pritjet për një rritje më të madhe të LDK-së kishin qenë më të larta, duke përmendur edhe ish-presidenten Vjosa Osmani.
Duke folur për mundësinë e një bashkëpunimi mes LDK-së dhe Lëvizjes Vetëvendosje, Salihaj tha se një koalicion i tillë do të ishte i vështirë për shkak të kundërshtimeve të mundshme brenda grupit parlamentar të LDK-së. Megjithatë, sipas tij, ky mbetet opsioni më i mirë për partinë.
“Do të jetë i vështirë një koalicion i LDK-së me VV-në për vet faktin se do të ketë deputet të LDK-së që s’do ta përkrahin dhe s’do ta votojnë një koalicion të tillë, por ndryshe unë mendoj që zgjidhja e vetme për LDK-në është ky koalicion. LDK ka bërë gabime të mëdha për fajin e liderit të saj, pra Lumir Abdixhikut, sepse unë i kam propozuar disa herë që nga viti i kaluar që të bëjë koalicion me VV-në dhe ta kërkojë postin e presidentit dhe të marrë pjesë në qeveri”, deklaroi ai./teve1.info/
