Miliona gra të diagnostikuara me kancer gjiri, mund të shmangin në mënyrë të sigurt kimioterapinë, falë një testi të ri gjenetik, që identifikon pacientet, që përfitojnë realisht nga ky trajtim dhe ata që mund të trajtohen vetëm me terapi hormonale, raportoi BBC.
Këtë përfundim e nxori një studim ndërkombëtar i udhëhequr nga Kolegji Universitar i Londrës (UCL), ku morën pjesë më shumë se 4 000 paciente të sapodiagnostikuara, mbi moshën 40 vjeç nga Britania e Madhe, Norvegjia, Suedia, Australia, Zelanda e Re dhe Tajlanda.
Si funksionon testi?
Shkencëtarët përdorën testin gjenetik “Prosigna”, i cili analizon aktivitetin e 50 gjeneve të lidhura me zhvillimin e kancerit të gjirit dhe vlerëson rrezikun e rikthimit të sëmundjes.
Pacientet me rezultat të ulët në test – që përbënin më shumë se dy të tretat e pjesëmarrëseve – nuk iu nënshtruan kimioterapisë, por u trajtuan vetëm me terapi hormonale.
Rezultatet kryesore
Mbi 66% e pacienteve mund të shmangin kimioterapinë.
Shkalla e mbijetesës pas pesë vitesh ishte:
93,7% te pacientet që nuk u trajtuan me kimioterapi;
94,9% te pacientet që u trajtuan me kimioterapi.
Diferenca e vogël sugjeron se shumë paciente nuk përfitojnë ndjeshëm nga kimioterapia.
Pse është i rëndësishëm ky zbulim?
Kimioterapia shpesh shkakton efekte anësore të rënda, si lodhje të vazhdueshme; të përziera; rënie të flokëve; dobësim të sistemit imunitar; probleme me fertilitetin.
Sipas studiuesve, testi mund të kursejë shumë paciente nga këto pasoja fizike dhe emocionale.
Ndikimi në sistemin shëndetësor
Sipas UCL, më shumë se 5 000 paciente në vit vetëm në sistemin britanik të shëndetësisë (NHS) mund të shmangin kimioterapinë falë këtij testi.
Drejtuesi i studimit, profesori Rob Stein, deklaroi se rezultatet, përfaqësojnë një hap të rëndësishëm drejt trajtimeve më të personalizuara.
“Shumë paciente mund të kursehen nga barra fizike dhe emocionale e kimioterapisë, ndërsa sistemet shëndetësore mund të përdorin burimet në mënyrë më efikase dhe të bazuar në prova shkencore”, tha ai.
Çfarë mbetet ende e paqartë?
Studiuesit theksojnë se ende nuk dihet nëse rezultatet vlejnë edhe për pacientet nën moshën 40 vjeç.
Për këtë grupmoshë nevojiten studime të mëtejshme dhe rezultatet priten pas disa vitesh.
Gjetjet do të prezantohen në takimin vjetor të Shoqatës Amerikane e Onkologjisë Klinike, konferenca më e madhe në botë kushtuar kërkimeve mbi kancerin, që zhvillohet në Çikago.
Studimi u drejtua nga Kolegji Universitar i Londrës, ndërsa drejtuesi kryesor ishte profesori Rob Stein.
Prova klinike u zhvillua në kuadër të studimit ndërkombëtar OPTIMA (Trajtimi optimal i personalizuar i kancerit të gjirit në fazë të hershme).
Ku u krye studimi?
Në studim morën pjesë mbi 4 400 paciente me kancer gjiri mbi moshën 40 vjeç nga gjashtë vende
Shkencëtarët përdorën testin gjenetik “Prosigna”, për të përcaktuar se cilat paciente kishin nevojë për kimioterapi dhe cilat mund të trajtoheshin vetëm me terapi hormonale.
Rezultatet treguan se më shumë se dy të tretat e pacienteve mund të shmangnin kimioterapinë pa rritur rrezikun e rikthimit të sëmundjes. /atsh
