Prokuroria Speciale e Republikës së Kosovës ka ngritur aktakuzë, me propozim për mbajtjen e gjykimit në mungesë, kundër 20 personave të akuzuar për krime lufte kundër popullsisë civile në Komunën e Gjakovës.
Sipas njoftimit të Prokurorisë, të pandehurit M.K., R.C., M.D., P.R., S.K., L.O., Zh.S., S.S., L.D., Z.R., D.G., Ç.B., V.B., R.B., R.R., L.R., M.Sh., M.R., S.G. dhe T.A. akuzohen për veprën penale “Krime lufte kundër popullsisë civile”.
Aktakuza thotë se gjatë viteve 1998-1999, M.K., në cilësinë e shefit të Sekretariatit të Punëve të Brendshme (SUP) në Gjakovë, R.C., në cilësinë e komandantit të njësive të Policisë së Posaçme (PJP), dhe M.D., në cilësinë e komandantit të Brigadës së 52-të të Artilerisë Raketore, së bashku me 17 të pandehurit e tjerë, kanë marrë pjesë në një operacion të gjerë ushtarako-policor gjatë të cilit, sipas aktakuzës, janë vrarë 107 civilë.
Sipas Prokurorisë, gjatë operacionit, gratë dhe fëmijët fillimisht janë ndarë nga burrat. Në aktakuzë thuhet se grave u janë marrë stolitë e arit, paratë dhe sendet e tjera me vlerë, ndërsa burrat janë ekzekutuar në shtëpitë dhe oborret e tyre, si dhe në lokacionin e njohur si “Ura e Taliqit”.
Po ashtu, sipas aktakuzës, gjatë operacionit janë djegur edhe shtëpitë e civilëve.
Prokuroria Speciale ka propozuar që gjykimi ndaj të akuzuarve të mbahet në mungesë.
