Duka i Sussex-it ka thënë se ndihet “shumë mirë” që është kthyer në Britani, pasi kaloi gjashtë vjet duke jetuar në Kaliforni.
Ai i tha rrjetit kanadez CTV: “Ka qenë shumë mirë. Ka qenë shumë mirë të kthehem në tokën britanike. Fëmijët janë të lumtur në shkollë dhe kjo më jep mundësinë të përqendrohem vërtet te Lojërat Invictus në Birmingham në korrik të vitit të ardhshëm.”, raporton BBC.
Princi Harry dhe Meghan u tërhoqën nga rolet e tyre si anëtarë të lartë të familjes mbretërore dhe nisën një jetë të re në SHBA në vitin 2020, përpara se të ktheheshin për të jetuar në Britani muajin e kaluar.
Mendohet se familja është vendosur në një pronë private jashtë Londrës, në zonën e Cotswolds.
Fëmijët e çiftit, Archie, shtatë vjeç, dhe Lilibet, pesë vjeç, u detyruan të transferoheshin në një shkollë tjetër vetëm disa ditë pasi kishin nisur mësimet, për shkak të shqetësimeve të sigurisë lidhur me transportin e tyre drejt dhe nga shkolla.
Kthimi i Harryt dhe Meghanit në Mbretërinë e Bashkuar është shoqëruar me tensione me familjen mbretërore.
Meghan ka qëndruar kryesisht jashtë vëmendjes publike, duke bërë pak paraqitje publike.
Harry ka marrë pjesë në disa aktivitete publike të lidhura me punën e tij me Lojërat Invictus.
Javën e kaluar, ai vizitoi një shkollë në Birmingham për të nisur një program arsimor të frymëzuar nga lojërat, ku luajti pickleball me nxënësit dhe mori pjesë në një orë shkencore mbi projektimin e protezave.
Lojërat do të zhvillohen në Birmingham nga 10 deri më 17 korrik të vitit të ardhshëm, ku pritet të garojnë në 12 sporte adaptive 550 ushtarakë dhe veteranë të plagosur, të lënduar ose të sëmurë nga 25 vende.
Harry foli për CTV pasi kreu një hedhje me parashutë në Toronto, për të nderuar një premtim që i kishte bërë një veterani 102-vjeçar të Luftës së Dytë Botërore dhe për të rritur ndërgjegjësimin për organizatat bamirëse që mbështesin ushtarakët.
I pyetur se çfarë e kishte nxitur rikthimin e familjes në Mbretërinë e Bashkuar, Harry tha se kishte “shumë arsye”, por nuk dha më shumë detaje.
Çifti thuhet se u befasua nga një letër e autorizuar nga Mbreti, e cila ritheksonte se ata janë qytetarë privatë dhe përcaktonte udhëzime për zyrtarët e lartë qeveritarë dhe ushtarakë lidhur me mënyrën se si duhet të trajtohen.
Princi Harry dhe Mbreti Charles kanë pasur një marrëdhënie të tensionuar që kur Duka dhe Dukesha e Sussex-it u tërhoqën nga rolet e tyre si anëtarë aktivë të familjes mbretërore dhe u shpërngulën në SHBA.
Ndërkohë, Sussex-ët janë në pritje të vendimit nëse do të përfitojnë siguri të financuar nga taksapaguesit gjatë qëndrimit në Mbretërinë e Bashkuar.
The post Princi Harry thotë se ndjehet “shumë mirë” që është kthyer në Britani pas gjashtë vitesh në SHBA appeared first on Gazeta Express.
