Ka muaj që po përballen me mungesë të herë pas hershme të ilaçeve.
E, tash kur po bëhej shtimi i produkteve në Listën Esenciale të barnave, televizioni Dukagjini ka mësuar se ish-drejtoreshës së Nefrologjisë, Mimozë Berbatovci Ukimeraj iu kërkua të përfshihen produkte që kushtojnë mijëra euro.
Por, ajo ka refuzuar, andaj pas presioneve të vazhdueshme dha dorëheqje nga pozita e drejtorëshes që po e ushtron për pesë vite.
“Ky vendim vjen pas një periudhe të gjatë përpjekjesh për të ushtruar detyrën me profesionalizëm, integritet dhe transparencë, në rrethana të karakterizuara nga mungesa e bashkëpunimit institucional me strukturat udhëheqëse të SHSKUK-së dhe QKUK-së dhe nga presionet e vazhdueshme që kanë cenuar pavarësinë time profesionale si dhe kanë pamundësuar ushtrimin normal të përgjegjësive që burojnë nga kjo pozitë.”
Jo vetëm kaq, si merr vesh televizioni, mosbashkëpunim mes klinikës e ShSKUK-së pati edhe kur disa prej aparaturave dolën jashtë funksionit.
Tutje, burime të Dukagjinit bëjnë me dije se për këto ankesa e pakënaqësi në dijeni kanë qenë edhe Ministria e Shëndetësisë.
Por nga ky institucion, s’dhanë qëndrim.
“Menaxhimi i stafit në QKUK është kompetencë e SHSKUK-së. Prandaj, për përgjigje lidhur me pyetjet tuaja, ju lutemi t’i drejtoheni Drejtorisë së SHSKUK-së”, thuhet në përgjigjen e MSh-së.
Por, ndonëse edhe sipas MSh-së, kompentenca u takon ShSKUK-së, këtë përgjegjësi se përmbushën të martën.
“Pas dorëheqjes së drejtoreshës së Nefrologjisë e cila deklaroi se erdhi për shkak të presioneve dhe mosbashkëpunimit, nga Shërbimi Spitalor Klinik e Universitar i Kosovës nuk u deklaruan”
Ndërkohë, Berbatovci s’qe e qasshme për deklaratë gjatë së martës në lidhje me këtë çështje.
