Dhuna shpërtheu të mërkurën mbrëma në periferi të Glengormleyt, rreth 10 kilometra nga qendra e Belfastit në Irlandën e Veriut, ku qindra protestues u përleshën me policinë.
Sipas raportimeve, rreth 300 persona, kryesisht burra të veshur me rroba të errëta dhe me fytyra të mbuluara, u mblodhën pranë një hoteli ku strehohen migrantë. Protestuesit tentuan të marshonin drejt hotelit Chimney Corner, ndërsa policia ndërhyri për t’i ndaluar.
Demonstruesit hodhën gurë dhe sende të tjera drejt automjeteve dhe mburojave të policisë, duke detyruar autoritetet të përdorin topat e ujit për shpërndarjen e turmës.
Shërbimi Policor i Irlandës së Veriut (PSNI) njoftoi se masat u morën pasi ndaj policëve u hodhën mjete të forta dhe për të ruajtur rendin publik, raporton The Guardian.
Ndërkohë, një automjet u përfshi nga flakët pranë rrethrrotullimit Sandyknowes në Newtownabbey, rreth 13 kilometra në veriperëndim të Belfastit. Re të mëdha tymi u panë në zonë, ndërsa policia u dislokua për të përballuar trazirat.
Autoritetet u bënë thirrje qytetarëve dhe shoferëve të shmangin zonën e Sandyknowes për shkak të incidenteve të vazhdueshme.
Ngjarjet shënojnë natën e dytë të trazirave në zonë, pas tensioneve të shkaktuara nga një sulm me thikë në Belfast.
