Piloti i linjës Dubai – Izrael tentoi ta rrëzonte aeroplanin
Një incident i pazakontë është raportuar gjatë një fluturimi të kompanisë FlyDubai të mërkurën në mëngjes, pasi avioni devijoi nga itinerari dhe u ul në mënyrë emergjente në Arabinë Saudite, përcjell albinfo.ch.
Sipas mediave lokale izraelite, në bord dyshohet se ka pasur një përleshje mes dy pilotëve. Njëri prej tyre raportohet të jetë nga Omani, ndërsa tjetri nga Emiratet e Bashkuara Arabe.
Mediat raportojnë se bashkëpiloti nga Omani dyshohet se ka tentuar të marrë kontrollin e avionit dhe ta rrëzojë atë. Pas uljes emergjente në Arabinë Saudite, ai është marrë në pyetje nga autoritetet.
Në hetimin për incidentin raportohet se është përfshirë edhe Izraeli, ndërsa autoritetet po përpiqen të përcaktojnë rrethanat dhe shkakun e saktë të ngjarjes.
Sipas raportimeve nga Tel Avivi, një prej pistave të hetimit është edhe mundësia që incidenti të ketë pasur motiv terrorist dhe që avioni të jetë tentuar të rrëzohej qëllimisht.
Megjithatë, rrethanat e incidentit dhe motivi i mundshëm mbeten objekt hetimi dhe nuk janë konfirmuar përfundimisht nga autoritetet.
Në lidhje me situatën e sigurisë, mediat izraelite raportojnë gjithashtu se kryeministri Benjamin Netanyahu ka anuluar një vizitë të planifikuar në jug të Izraelit për të marrë pjesë në diskutime mbi çështjet e sigurisë.
Hetimet pritet të përcaktojnë se çfarë ka ndodhur gjatë fluturimit dhe nëse veprimet e raportuara të bashkëpilotit kanë qenë të qëllimshme.
The post Përleshje mes pilotëve, avioni devijon drejt Arabisë Saudite appeared first on Gazeta Express.
